पोखरा, २६ गते /नेपाल पत्रकार महानसंघ प्रदेश नम्बर ४को पहिलो साधारणसभा भदौको ७ र ८ गते पोखरामा हुने भएको छ । प्रदेश नम्बर ४ अन्तर्गतका जिल्ला शाखाका अध्यक्ष र सचिवको भेलाले शनिबार पहिलो साधारण भेला गर्ने निर्णय गरेको हो । भेलाले साधारण सभा सम्पन्न गर्न प्रदेश नम्बर ४ का अध्यक्ष त्रिभूवन पौडेलको नेतृत्वमा प्रदेश समिति सहित प्रदेश ४का सबै जिल्लाका सभापति सदस्य रहनेगरी मुल अयोजक समिति गठन गरेको छ ।
नेपाल पत्रकार महासंघ प्रदेश नम्बर ४ ले हरेक वर्ष १ जना पत्रकारलाई ५५ हजार रुपैयाँ राशीको पुरस्कार प्रदान गर्ने घोषणा गरेको छ ।पोखरा लेखनाथ ६ निवासी भरतबहादुर भट्टराई, चित्रबहादुर भट्टराई, चीनबहादुर भट्टराई, गोपी बहादुर भट्टराई र विमला भट्टराई अधिकारी परिवारको तर्फबाट स्वर्गिय माता र पिता रुद्धबहादुर/पूर्णकुमारी भट्टराई स्मृति पत्रकारीता पुरस्कारका लागि प्राप्त हुने अक्षय कोषबाट प्रदान गर्नेगरी उक्र पुस्कार प्रदान गर्ने घोषणा गरिएको हो ।समाजलाई रुपान्तरण गर्ने र राज्यको चौथो अंगको रुपमा लिइने पत्रकारलाई पुरस्कारका लागि मातापिताको स्मृतिमा अक्षयकोष खडा गर्ने निर्णय गरेको गोपीबहादुर भट्टराईले जानकारी दिएका छन् ।
नेपाल पत्रकार महासंघ प्रदेश नम्बर ४ ले अयोजना गरेको प्रदेश अन्तर्गतका जिल्ला सभापति र सचिवहरुको भेलाले ७ बुँदे लुम्ले घोषणा पत्र जारी गरेको छ । घोषणा पत्रमा श्रमजिवि पत्रकारिता ऐनको पूर्णरुपले पालना गर्न सम्पूर्ण सञ्चार संस्थालाई आग्रह गरिएको छ ।प्रदेश सरकारले आफ्नो बजेटमा सरकारले नै सञ्चार संस्था सञ्चालन गर्ने भनि उल्लेख गरिएकामा ध्यानाकर्षण भएको घोषणा पत्रमा उल्लेख छ ।
प्रदेश सरकारलाई आफै सञ्चार सस्था सञ्चालन गर्न भन्दापनि भएका निजी सञ्चार सस्थालाई व्यवस्थित, मर्यादित र विश्वसनीय बनाउन र समानुपातिकढंगले विज्ञापन प्रदान गर्र्दै नियमन गर्न आग्रह गरिएको छ ।प्रदेश भेलाले समग्र प्रदेश नम्बर ४ मा रहेका प्राकृतिक, सास्कृतिक र सबै प्रकारका सार्वजनिक सम्पत्तिको अतिक्रमण रोक्न र विकासका लागि बृहत गुरुयोजना बनाउन समेत आग्रह गरेको छ । यसैगरी पत्रकार सदस्य सुद्धिकरणका लागि महासंघ केन्द्रीय समितिलाई अनुकुल हुनेगरी विधान संसोधन गर्नसमेत आग्रह गरिएको छ ।
कार्यक्रममा प्रदेश नम्बर ४ का आन्तरिक मामिला तथा कानून मन्त्री हरिबहादुर चुमानले प्रदेश सरकारलेसञ्चार माध्यम सञ्चालन सञ्चालन गर्ने उल्लेख गरेपनि सञ्चार क्षेत्रसंग सहकार्य गरेर मात्र अगाडि बढ्ने बताए । पत्रकार महासंघ प्रदेश नम्बर ४ ले आयोजना गरेका मातहतका जिल्ला सभापति र सचिवहरुको भेलालाई सम्बोधन गर्दै उनले यस्तो बताएका हुन् । अहिले कानून निर्माणकै चरणमा रहेकाले सञ्चार क्षेत्र सहित सबैपक्षसंग आबश्यक सहकार्य गरेरै अगाडि बढ्ने उनले प्रष्टाए ।
प्रदेश सांसद राजिव पहारीले प्राकृतिक सम्पदाको संरक्षणका लागि कलम चलाउन आग्रह गरे । पोखरा क्षेत्रीय अन्तर्राष्ट्रिय विमानस्थल समेत तोकिएकै समयमा बन्ने उनको भनाई छ । विमानस्थल निर्माणको काम प्रधामन्त्री र मन्त्रीको दयामयाले सुरु नभई पोखरेलीको संघर्ष र त्यागको परिणाम भएको उनको भनाई थियो ।कार्यक्रममा नेपाल पत्रकार महासंघका केन्द्रीय सदस्यहरु रामकृष्ण ज्ञवाली र नवीन कुइकेल, प्रदेशका सल्लाहकारहरु कोमलनाथ बराल, रवीन्द्र बास्तोला र नवराज सुवेदी लगायतले बोलेका थिए ।भेलामा पत्रकार महासंघ प्रदेश ४ अन्तर्गत ११ वटै जिल्लाका सभापतिले जिल्लाको बस्तुगत अवस्थाका बारेमा जानकारी थिए । महासंघ प्रदेश ४का महासचिव दीलिप पौडेलले सञ्चालन गरेको उद्घाटन सत्रको कार्यक्रममा स्वागत उपाध्यक्ष नारायण शर्माले गरेका थिए ।