पोखरा, ७ भदौ / गण्डकी प्रदेशका प्रदेश प्रमुख बाबुराम कुँवरले प्रदेश सभाले पारित गरेको ‘मुख्य
न्यायधिवक्ताको काम, कर्तव्य, अधिकार तथा सेवा शर्त सम्बन्धमा व्यवस्था गर्न बनेको विधेयक’ लाई
प्रमाणिकरण गरेका छन् ।
प्रदेश सभाले साउन ३१ गते पारित गरेको उक्त विधेयक प्रदेश प्रमुख कुवँरले विहिबार प्रमाणिकरण गरेका हुन् ।
प्रदेश सभाले पारित गरेको उक्त विधेयकलाई नेपालको संविधान धारा २०१ को उपधारा १ बमोजिम गण्डकी
प्रदेशका सभामुख नेत्रनाथ अधिकारीले भदौ ५ गते प्रमाणित गरेका थिए ।
सभामुखले प्रमाणित गरेपछि प्रदेश सभा सचिवालयले प्रमाणिकरणका लागि प्रदेश प्रमुखको कार्यालयमा
पठाएको थियो । प्रदेश प्रमुख कुँवरले पाउने बित्तिकै विहीबार नै उक्त विधेयकको पाँच प्रतिमा हस्ताक्षर गरि
प्रमाणिकरण गरेका थिए ।
नेपालको संविधान धारा २०१ को उपधारा २ बमोजिम प्रदेशश प्रमुखले विधेयक प्रमाणिकरण गर्नुपर्ने प्रावधान
रहेको छ । सोही धाराको उपधारा ५ बमोजिम प्रदेश प्रमुखले प्रमाणिकरण गरेपछि यो विधेयक ऐन बन्छ ।
गण्डकी प्रदेश प्रमुखको कार्यालयका कानून अधिकृत अनम सुवेदीले प्रदेश प्रमुख कुँवरले प्रमाणित गरेको
विधेयकमध्ये एक प्रति प्रदेश प्रमुखको कार्यालयमा राखिएको छ भने आन्तरिक मामिला तथा कानुन मन्त्रालय,
मुख्यमन्त्री तथा मन्त्रीपरिषदको कार्यालय, प्रदेश सभाको सचिवालय र संघिय कानून तथा संसदिय व्यवस्था
मन्त्रालयमा एक/एक प्रति बिहीबार नै पठाइएको जानकारी दिए ।