पोखरा २२ असार /पोखराका ट्याक्सी चालक सुरेश नेपालीले आफुले भेटाएका सुनको रानीहार बुझाएका छन् ।
ग१ज ३५७१ नम्बरको ट्याक्सीका चालक नेपालीले भद्रकाली शाखामा आवद्व रहेर ट्याक्सी संचालन हुदै आएका थिए । ट्याक्सीमा बिहीबार राती कसैले सूनको पाँच तोलाको रानीहार छोड्यो ।
भोलिपल्ट अर्थात शुक्रवार साँझ ट्याक्सी सफा गर्ने क्रममा सिटमा च्यापिएको अवस्थामा सुरेशले रानीहार भेट्टाए । रानीहार भेट्टाएपछि उनले सक्कली वा नक्कली के हो भन्ने ठम्याउन सकेनन् अनि श्रीमतीलाई सोध्ने निर्णय लिदै यात्रु बोकेर फेरि काहुँ र लेकसाइडतर्फ हुइकिए ।
राती घर पुगेर श्रीमतीलाई देखाएपछि रानीहार सुनको नै हो भन्ने टुङ्गो लाग्यो, चालक सुरेशले भने – ‘त्यसपछि रानीहार पाएको बारेमा चालकहरुलाई जानकारी दिदै कसैले खोजे सम्पर्क गरिदिन आग्रह गर्न थाले ।’
उनले शुक्रबार राती नै गण्डकी ट्याक्सी व्यवसाय पब्लिक लिमिटेडका कार्यकारी प्रमुख पूर्ण जिसिलाई पनि त्यस बारे जानकारी दिए । दुवैको सल्लाहा भयो शनिबार बिहान रानीहार लिएर जिल्ला प्रहरी कार्यालय कास्कीमा जाने ।
संयोग नै मान्नुपर्छ रानीहार भेट्टिएको विषय चालक बीच चल्न थालेपछि रानीहार हराउँने परिवारका सदस्यले पनि थाहाँ पाए । त्यो रानीहार पाउँने र हराउने परिवारको जिल्ला प्रहरी कार्यालयमा शनिबार बिहान भेट भयो । प्रहरी कार्यालयको रोहवरमा चालक सुरेशले रानीहार बुझाए ।
सो रानीहार पोखरा–८ सिमलचौर निवासी अर्जुन शर्माकी श्रीमती सुरक्षाको हो । जिल्ला प्रहरी कार्यालय कास्कीका प्रहरी नायव उपरीक्षक राजकुमार केसीको रोहवरमा सुरेशले रानीहार अर्जुन शर्मालाई बुझाएका थिए । शर्मा रिजनल हस्पिटलका मेनेजर पनि हुन् । हराएको रानीहार पाउदाँ शर्मा खुशी भए । अनी उनले सुरेशको इमान्दारिताको कदर गर्दै केही नगद र खादा लगाएर सम्मान गरे ।
तीन लाख मूल्य बढीको गहना हराएपछि शर्माले पनि त्यसको खोजी नगर्ने कुरै भएन । मैलेले पनि खोजिको प्रयास गरिरहेको थिए, तर यत्ति सजिल्लै पाइएला भन्ने लागेको थिएन उनले भने, ‘उनले उदाहणीय काम गरेका छन्, चालकको इमान्दारिताबाट सवैले सिक्नुपर्छ।’
बिहीबार राती शर्मा दम्पत्ति सहित दुई बालबच्चा र बुबा डिल्लिप्रसाद शर्माले सृजनाचोकको रवी महलदेखि सिमलचौरसम्म पुग्नका लागि सो ट्याक्सी प्रयोग गरेका थिए ।