पोखरा, ११ जेठ /अर्को महिनाबाट सुरु हुने कोपा अमेरिका फुटबल प्रतियोगिताको टिम घोषणा भएको छ । एक सय वर्ष पूरा भएको अवसरमा हुन लागेको प्रतियोगिताका लागि सहभागी १६ देशले सोमबार २३ खेलाडी सम्मिलित अन्तिम टिम घोषणा गरेका हुन् । फुटबलको पुरानो अन्तर्राष्ट्रिय प्रतियोगिता कोपा अमेरिका फुटबल अर्को महिना अमेरिकामा सुरु हुँदैछ ।
पाँच पटकका बालोन डी’ओर विजेता अर्जेन्टिनाका लियोनल मेस्सी, चिलीका एलेक्स सान्चेज र ब्राजिलका डानी अल्वेस यसपटक चर्चामा रहेका नाम हुन् । समूह डीमा रहेको अर्जेन्टिनालाई १५ पटक उपाधि दिलाउन मेस्सीले महत्वपूर्ण भूमिका खेल्ने अपेक्षा गरिएको छ ।
अर्जेन्टिनाले समूह चरणको पहिलो खेलमा जुन ६ मा गएको वर्षको विजेता चिलीसँग क्यालिफोर्नियामा खेल्ने छ । आर्सनलका स्ट्राइकर सान्चेज गएको वर्ष जस्तै यसपटक चिलीलाई उपाधि दिलाउन महत्वपूर्ण भूमिकामा हुनेछन् । ब्राजिलका राइट ब्याक अल्वेस युरोपियन क्लब प्रतियोगितामा अहिलेसम्मकै उत्कृष्ट फुटबलर मध्ये एक हुन् ।
उनी ब्राजिललाई ९ औं पटक दक्षिण अमेरिकाको च्याम्पियन बनाउने प्रयासमा टिममा हुनेछन् । यस्तै अरु चर्चा गरिएका नाम अमेरिकाका माइकल ब्राडली, मेक्सिकोका जाभिएर हर्नान्डेज तथा कोलम्बियाका जेम्स रोड्रिग्वेज हुन् । जुन ३ मा सुरु हुने प्रतियोगिता दक्षिण अमेरिका बाहिर हुन लागेको यो पहिलो पटक हो । प्रतियोगिताको फाइनल खेल जुन २६ मा हुनेछ ।
कुन समूहमा कुन देश
समूह ए -अमेरिका, कोलम्बिया, कोस्टारिका र पाराग्वे
समूह बी – ब्राजिल, इक्वेडर, हाइटी र पेरु
समूह सी – मेक्सिको, उरुग्वे, जमैका र भेनेजुएला
समूह डी – अर्जेन्टिना, चिली, पानामा र बोलिभिया
एजेन्सी सहयोगमा