पोखरा ३० मंसिर । पोखरामा यस वर्ष पनि अन्तर्राष्ट्रिय पर्वतीय चलचित्र महोत्सव हुने भएको छ । पोखरा फिल्म सोसाइटीको आयोजनामा पुस ६ गतेदेखि ८ गतेसम्म दोश्रो पोखरा अन्तर्राष्ट्रिय पर्वतीय चलचित्र महोत्सव हुने बिहीबार पोखरामा पत्रकार सम्मेलनको आयोजना गरी जानकारी दिएको हो ।पोखरा सभागृहमा हुने महोत्सवमा राष्ट्रिय तथा अन्तर्राष्ट्रिय ५० भन्दा बढी चलचित्रहरुको प्रदर्शन गरिने सोसाइटीका अध्यक्ष घनश्याम लामिछानेले जानकारी दिए ।
महोत्सवमा वृतचित्र, लघु चलचित्र, कथानक चलचित्र, प्रयोगात्मक चलचित्र र एनिमेसन चलचित्रलाई समेटिने लामिछानेले बताए ।महोत्सवका लागि पोखरामा बनेका ३ चलचित्रलाई छनोट गरिएको छ । पोखराबाट छनौटमा परेको चलचित्रमा विष्णु पौडेलको ‘मिरर’, महेश श्रेष्ठको ‘नयाँ झुल’ र मनोज घर्तीमगरको ‘भर्तीको राजनीति’ छनोटमा परेको महोत्वस संयोजक सरोज सापकोटाले बताए ।महोत्सवमा सहभागिताका लागि १ सय देशका ६ सय बढी चलचित्रहरुले आवेदन दिएको सापकोटाले जानकारी दिए ।
पर्वत वा हिमाली क्षेत्र आसपासका संस्कृति, जनजीवन, परम्परा, जैविक विविधता र पर्यावरणको सम्वर्द्धन र प्रवर्द्धनका विषयवस्तु समेटिएका चलचित्रलाई महोत्सवमा समावेश गरिने सोसाइटीका सचिव विष्णु गौतमले बताए । महोत्सवको अवसरमा ‘नेपाली चलचित्र’ विषयक छलफल तथा अन्तर्क्रिया कार्यक्रमहरु पनि हुने उनले बताए । महोत्सवको मुख्य कार्यक्रम बाहेक हरेक साँझ पोखरा आसपासका केही प्रमुख स्थानहरुमा निःशुल्क चलचित्रहरुको प्रदर्शन समेत गरिने लामिछानेले बताए । महोत्सव सम्पन्न गर्नका लागि करिब ५ लाख खर्च लाग्ने आयोजकको अनुमान छ ।