पोखरा, २६ भदौ/सेपअप जुम्बा एण्ड एरोविक फिटनेस सेन्टरको आयोजना तथा एस.टी. क्रियशनको ब्यबस्थापनमा भएको मिस एण्ड मिसेस फिटनेस २०१६ को उपाधि बिजु रानामगरले जितेकी छन् ।
अन्य प्रतिस्प्रर्धीलाई पछि पार्दै रामबजारकी २३ बर्षिया बिवाहित बिजु रानामगरले मिस एण्ड मिसेस फिटनेश २०१६ को ताज पहिरिन सफल भईन् । उनले वेष्ट पर्सनालिटी र मोस्ट पपुलर अवार्ड पनि आफ्नो पोल्टामा पारिन् । “अहिलेका युवाहरु रोजगार वा उच्च शिक्षाको लागि विदेशिने प्रवृतिलाई तपाई कसरी लिनुहुन्छ ? र स्वदेशमै युवा शक्तिलाई परिचालन गर्न सकिने उपायहरु के–के हुन सक्छन् ?” भन्ने निर्णायकको अन्तिम प्रश्नको सर्बोकृष्ट जवाफ दिँदै बिजुले निर्णायक र दर्शकहरुको मन जित्न सफल भई मिस एण्ड मिसेस फिटनेश २०१६ को बिजेता बन्न सफल भएकी हुन् ।
एन.आर.एल. मा ल्याब टेक्निसीयनको रुपमा कार्यरत बिजुले बिजेताको क्राउन सँगै ३० हजार रुपैया नगद र अन्य हजारौका गीफ्ट भौचरहरु प्राप्त गरिन् । त्यस्तै प्रतियोगितामा न्यूरोडकी २० वर्षीया मिस रोशनी चौधरीले फस्ट रनरअपको उपाधि संगै मोस्ट ट्यालेन्टेड र मोस्ट पङ्चुअल अर्वाड हात पारिन् भने सेकेण्ड रनरअपमा तनहुँकी २४ बर्षिय मिस प्रमिला थापामगर हुन सफल भईन् उनले मोस्ट इन्थुजिएस्टीक अर्वाड पनि प्राप्त गरिन् ।
उनीहरूले क्रमस क्राउन संगै २० हजार र १५ हजार नगद रुपैया सहित आर्कषक पुरस्कार प्राप्त गरेका थिए । उपाधी प्राप्त गर्नका लागि प्रतियोगिहरुलाई लेखन र वक्तृत्वकला समेत प्रस्तुत गर्न लगाईएको थियो । प्रतियोगितामा प्रतिस्प्रर्धीले जुक्बा नृत्य राउण्ड, परिचय राउण्ड, प्रश्न उत्तर राउण्ड र अन्तिम प्रश्नको उत्तर लेखेर बाचन गरिसके पछि अन्तिम निर्णय आएको थियो ।
सञ्चारकर्मी सुरज थापाको कोरियोग्राफी भएको उक्त कार्यक्रमा सह–कोरियोग्राफरको रुपमा पुजन ज्योती थापा, सौरभ थापा रहेका थिए ।