पोखरा, १८ भदौँ /“तेस्रो जननी तिज विशेष हस्तकला व्यापार मेला–२०७३” सम्पन्न भएको छ । “आर्थिक समृद्धिका लागि उद्यमशीलता आजको आवश्यकता” भन्ने मुल नाराका साथ पद्मावती मिडिया प्रा.लि द्वारा सञ्चालित रेडियो जननी ९०.६ को आयोजनामा सम्पन्न भएको मेलामा उद्यमशीलता र सरसफाई सम्बधी सामुहिक तीज गीत प्रतियोगितामा धारापानी आमा समुह प्रथम हुँदै नगद रु २० हजार जितेको छ ।
द्धितिय हुन सफल विश्वकर्मा महिला समुहले नगद रु १५ हजार, तृतीय हुँदै दिदिबहिनी समुह हेमजाले नगद रु १० हजार जितेको छ । त्यस्तैगरी महाकालेश्वर टोल विकास संस्था समुहले सान्त्वना हुँदै ३ हजार पुरस्कार जितेको छ । उत्कृष्ट भेषभुषामा प्रगतिशिल आमा समुहले नगद रु ३ हजार हात पारेको छ भने उत्कृष्ट नृत्यमा अलकापुर आमा समुहले नगद रु ३ हजार पुरस्कार जितेको छ ।
प्रतियोगिताको निर्णायकमा लोक तथा दोहोरी गीत प्रतिष्ठान धौलागीरीका निर्वतमान अध्यक्ष तथा संगित संयोजक तारानाथ आचार्य, लोक तथा दोहोरी गीत प्रतिष्ठान गण्डकीका महा सचिव सुरेन्द्र गुरुङ, र लोक गायीका लक्ष्मी सुवेदी रहनुभएको थियो । तीज गीत प्रतियोगितामा ४० समुहले सहभागीता जनाएका थिए ।
कार्यक्रममा सासंद सारदा पौडेलले तडकभडक विनाको तीज मनाउन आग्रह गर्दै रेडियोले उद्यमशील बन्न प्रेरित गर्दै विभिन्न वडामा गरिएका कार्यक्रमहरुको प्रशंसा गर्नुभयो । उहाँले पोखरा उद्योग वाणिज्य संघमा अध्यक्षको उम्मेदवार दिनुभएकोमा रेडियो जननीका अध्यक्ष हिरा भट्राईलाई सहयोग गर्न सबैमा आग्रह गर्नुभयो । उहाँले अहिलेको संविधानले महिलाहरुको हक र अधिकारको सुनश्चित गरेको बताउनुभयो ।