सुरेन्द्र पौडेल
पोखरा, २० मंसिर /पोखराको फेवाताल किनारदेखि सराङकोटसम्म अन्नपूर्ण केबलकार प्रालिको लगानीमा केबलकार बन्दैछ । केवलकार निर्माणको लागि प्रालि र निर्माणको जिम्मेवारी पाएको चितवन कोइ कम्पनीबीच मंसिर पहिलो साता नै सम्झौता भइसकेको छ । सम्झौतासँगै केबलकार निर्माणको डिजाइन लेआउट गर्ने काम भइरहेको छ ।
केबलकार निर्माणको प्रारम्भिक काम भइरहेपनि निर्वाचन लगत्तै डोजर लगाएर तिब्र रुपमा निर्माणको काम अगाडि बढाइने परामर्श दाता रोपवे नेपालका अध्यक्ष तथा इन्जिनियर गुणराज ढकालले पोखरामा आयोजित पत्रकार भेटघाटमा जानकारी दिए ।
‘ढिलोमा १० देखि १५ दिनभित्र डोजर प्रयोग गरेर निर्माणको कामले तिब्रता पाउँछ,’ ढकालले भने, ‘अबको डेढ वर्षभित्र पोखराबाट सराङकोटसम्म केबलकार सञ्चालन हुन्छ ।’ पोखराको पर्यटनमा केबलकार नयाँ र महत्वपूर्ण प्रडक्ट बन्ने ढकाल बताउँछन् । फेवाताल किनार सेदीदेखि सराङकोटसम्म केबलकार सञ्चालन भएपछि पोखरामा पर्यटकको आगमन बढ्ने विश्वास गरिएको छ ।
गत वर्ष शिलान्यास भएपनि केही प्रक्रिया पुरा गर्ने क्रममा निर्माणमा ढिलाई भएको थियो । केबलकारमा १ अर्ब १० करोड रुपैयाँ लगानी हुँदैछ । १ अर्ब रुपैयाँ लागतमा निर्माण गर्ने लक्ष्य भएपनि १० करोड रुपैयाँ लगानी बढेको प्रालिका अध्यक्ष कालु गुरुङले जानकारी दिए । केबलकारमा नेपालीहरुको ८५ प्रतिशत र विदेशी लगानीकर्ताको १५ प्रतिशत लगानी रहनेछ । विदेशी लगानी अन्तर्गत जापानी नागरिक टाकासी मियाहारा केबलकारसँग जोडिएका छन् । नेपाली लगानी अन्तर्गत नेपाली व्यवसायीहरुको ७५ प्रतिशत र स्थानीय जनताको १० प्रतिशत लगानी रहने गुरुङले जानकारी दिए ।
सेदीमा तल्लो स्टेसन र सराङकोट भुमरीगैरामा माथिल्लो स्टेसन रहनेछ । केबलकार निर्माणका लागि सनराइज बैंक र राष्ट्रिय वाणिज्य बैंकले वित्तीय लगानी गर्नेछन् । जापानी कम्पनी निप्पोनले केबलकारको प्राविधिक पक्षमा सहयोग गर्नेछ । अन्तर्राष्ट्रिय मापदण्ड अनुसार सुरक्षा प्रणाली अपनाएर केबलकार निर्माण गरिने गुरुङले जानकारी दिए । पोखराको पर्यटन प्रवद्र्धनको लक्ष्यसहित निर्माण हुन लागेको केबलकारका लागि पोखराका पर्यटन व्यवसायी, संघसंस्था तथा स्थानीयबासीबाट साथ मिलेको गुरुङ बताउँछन् ।
सूर्योदय, सूर्यास्त, हिमालय, वरपरको हरियाली दृश्य, पोखरा, फेवाताल लगायतका दृश्यावलोकनका लागि सराङकोट प्रशिद्ध छ । सराङकोटमा पछिल्लो समय स्तरीय होटलहरु समेत थपिने क्रम जारी रहेकाले पर्यटकहरु अझै बढ्ने ढकालले बताए । ‘सराङकोट पुगेका पर्यटकलाई भुलाउन त्यस आसपासमा अन्य गन्तव्यहरुको पनि विकास गर्न आवश्यक छ,’ उनले भने ।