पोखरा, १७ भदौ/ गण्डकी प्रदेशकै ठूलो मोबाइल बजार आइतबारबाट पोखराको महेन्द्रपुलमा सञ्चालनमा
आएको छ । एउटै भवनबाट मोबाइल सम्बन्धी सम्पूर्ण सेवा उलब्ध गराउने लक्ष्यसहित पोखरा टावर प्रालिले
सञ्चालन गरेको बजार शुभारम्भसँगै मोबाइल मेला पनि आइतबारबाट सुरु भएको छ ।
बजार र मेलाको गण्डकी प्रदेशका उद्योग, पर्यटन, वन तथा वातावरण मन्त्री विकास लम्सालले उद्घाटन गरे ।
उनले उद्योगी, व्यवसायी र नागरिकले कर तिर्न कन्जुस्याइँ गर्न नहुनेमा जोड दिए । उनले भने, ‘अहिलेकै
गतिमा विकास र समृद्धि सम्भव छैन । यही करले हाम्रो विकास पनि हुँदैन । समृद्धि बढाउन नागरिकको
योगदान बढ्नै पर्छ ।’
उनले समृद्धि र विकास निजी क्षेत्रसँगै सहकार्यमा हुने प्रस्ट गरे । उनले भने, ‘उद्योग, व्यवसाय गर्ने वातावरण,
लगानीको अवसर, उचित सेवा, सुविधा, सुरक्षा माग गर्नुस् । उद्योग, व्यवसाय राम्ररी चलून्, हामी राज्यले
तोकेको कर तिर्न तयार छौं भन्ने प्रतिवद्धता सरकारले चाहेको छ ।’ राज्यका सबैजसो क्षेत्र व्यवस्थित नभएकाले
एकैपटक सबै कुरा परिवर्तन र उपलब्धिको अपेक्षा नगर्न उनले आग्रह गरे ।
सांसद विन्दुकुमार थापाले संघीयता लागू भए पनि प्रतिवद्धता अनुरुप अझै सेवा, सुविधा घर, आँगनमै आएन
भन्ने नागरिकको गुनासो रहेको उल्लेख गरे । उनले करको दायरा बढाउन अनुरोध गर्दै दर यथावत राख्न सुझाए
। नेपाल उद्योग वाणिज्य महासंघ गण्डकी प्रदेश अध्यक्ष सञ्जीवबहादुर कोइरालाले निजी क्षेत्रले लगानी
गरेपछि प्रतिफल खोज्नु स्वभाविक भएको बताए । उनले नियम, कानुनले व्यापार, व्यवसाय र करको विषयमा
स्पष्ट गरेको बताए ।
टावरमा सम्पूर्ण ब्रान्डका मोबाइलको बिक्री तथा सेवा उपलब्ध हुने भएकाले मोबाइल किन्न, बनाउन, जानकारी
लिने उपयुक्त गन्तव्य पोखरा मोवाइल टावर बनेको प्रालिका सचिव नारायण सुवेदीले बताए । जुनसुकै बेला
घरबेटीले भाडा बढाउने, व्यवसाय छाड्नुपर्ने, अस्वस्थ प्रतिश्पर्धा आदिलाई निरुत्साहित गर्न सामूहिक रुपमा
व्यापार, व्यवसाय विकल्प बन्ने उनले बताए ।
महेन्द्रपुलमा रहेको ५ तले भवनमा पोखराका ८ युवा व्यवसायीको लगानीमा टावर सञ्चालनमा आएको हो ।
केही महिनादेखि अनौपचारिक सेवा दिइरहेको टावरमा आइतबार सुरु भएको मेला भदौ २७ गतेसम्म चल्नेछ ।
टावरमा ८० वटा भन्दा बढी मोबाइलका होलसेट र रिटेल पसल छन् । एक्स्पोमा विभिन्न कम्पनीका मोबाइलमा
५० प्रतिशतसम्म छुट दिइएको छ । हरेक दिन लक्की ड्रका आधारमा ५ जनालाई आकर्षक उपहार र मेलाको
अन्तिम दिन ३ जनालाई विशेष उपहार दिइएको पोखरा टावरका अध्यक्ष उदय केसी लाहुरे दाइले बताए । मेलाकै
सहभागीमध्येबाट आउँदो तिहारमा १ जनालाई बम्पर उपहार स्कुटर प्रदान गरिने प्रालिले जनाएको छ ।
एक्स्पोमा ल्यापटप तथा कम्प्युटरका शोरुम, इलेक्ट्रोनिक्स ग्याजेट, आइटीका नयाँ प्रविधि आदिबारे पनि
जानकारी दिइनेछ । मेला अवधिभर टावरमा बिहान १० बजेदेखि साँझ ८ बजेसम्म चल्नेछ ।