लमजुङ । लमजुङ सदरमुकाम बेसीसहर नगरपालिका ८ मा रहेको कालिका बचत तथा ऋण सहकारी संस्था लिमिटेडमा कार्यरत कर्मचारीको साथबाट डेढ लाख रुपैयाँ लुटिएको छ ।
आइतबार दिउँसो संकलित बचत रकम लिएर बेसीसहर नगरपालिका–११ रामचोकबेसीबाट बेसीसहर नगरपालिका–१ उदिपुर आउँदै गर्दा बजार प्रतिनिधि शान्ती अछामीको साथबाट रकम लुटिएको सहकारीले जनाएको छ ।
कालिका सहकारीका प्रमुख कार्यकारी अधिकृत वेदराज खनियाँका अनुसार अछामीको साथमा रहेको रकमसहितको कागजातपत्र र मोबाइल राखेको झोला लुटिएको हो ।
कालो मास्क लगाएको पुरुषले लुटेर भागेको बजार प्रतिनिधि अछामीले सहकारीलाई बताएकीे छिन् । घटना बारे अनुसन्धान भइरहेको लमजुङका प्रहरी नायव उपरीक्षक गंगाबहादुर थापाले बताए ।