लमजुङ । लमजुङ प्रहरीले अवैध जडिबुटीसहित ५ जनालाई पक्राउ गरेको छ । प्रहरीले सदरमुकाम बेसीसहर नगरपालिका–८ नारायनस्थान बाट ३ जना र झिंगेखोलाबाट २ जनालाई पक्राउ गरेको हो ।
प्रहरी नायब उपरीक्षक गंगाबहादुर थापाका अनुसार पक्राउ पर्नेहरुमा नारायणस्थानबाट मनाङ नार्फु गाउँपालिका वडा नं. २ बस्ने ४५ वर्षीय लाम्पा छिरिङ, मनाङ नेस्याङ गाउँपालिका वडा नं. ३ वस्ने २९ वर्षीय पल्मु लामा, लमजुङ दोर्दी गाउँपालिका ८ बस्ने ३१ वर्षीय जिप चालक कर्ण गुरुङ रहेका छन् भने, झिंगेखोलाबाट पक्राउ पर्नेहरुमा ४४ वर्षीय शान्ता कुमारी तामाङ र ४६ वर्षीय मीनबहादुर तामाङ रहेका छन् ।
शनिबार राति पक्राउ परेको ३ जना मनाङबाट लमजुङ आउँदै थिए । शनिबार मनाङबाट लमजुङको नारायण स्थानतर्फ आउँदै गरेको ग १ ज ७४५३ नम्बरको बोलेरो जिपलाई तलासी गर्दा अवैध जडिबुटी भेटिएको थापाले जानकारी दिए । त्यस्तै लमजुङको झिंगेखोलाका शान्ता र मीनबहादुरको घर खानतलासी गर्दा जडिबुटी भेटिएपछि प्रहरीले पक्राउ गरेको हो ।
मनाङबाट आएकाहरुबाट जटामसी, बुकीफुल, धुपीपात, सुनपाती, भोजपत्र गरी २ सय १५ किलो अवैध जडिबुटी रहेको प्रहरीले जनाएको छ । त्यस्तै, झिंगेखोलाबाट पक्राउ परेका २ जनाको घरबाट पाँचऔले, निरमसी, मजिठो, पिप्ला, सतुवा, जटामसी, ढालिङ र कुड्की गरी ४२८.४ किलो अवैध जडिबुटी रहेको प्रहरीले जनाएको छ ।
७०५.५ किलो विभिन्न जडिबुटीको अनुमानित १९ लाख ३२ हजार २ सय ९० रुपैयाँ रहेको छ । पक्राउ परेका ५ जनालाई नै आइतबार डिभिजन वन कार्यालय लमजुङमा बुझाएको प्रहरीले जनाएको छ ।