प्रकाश ढकाल
पोखरा, १३ जेठ /शुक्रबार पोखराको पन्ध्रौं मेयरको रुपमा मान बहादुर जिसी निर्वाचित भएका छन् । बैशाख ३१ को चुनावले जिसीलाई महानगरको पहिलो र नगरपालिका स्थापना देखिको पन्ध्रौं मेयरको रुपमा निर्वाचित गरेको हो । एमालेबाट उम्मेदवारी दिएका जिसीले निकटतम प्रतिश्पर्धी नेपाली काँग्रेसका उम्मेदवार रामजी कुवँरलाई १३ हजार ७ सय २ मतान्तरले पराजीत गरे । जिसीको कुल ६० हजार १ सय १८ मत आउँदा कुँवरले ४६ हजार ४ सय १६ मत प्राप्त गरे ।
उपमेयर पदमा पनि एमाले उम्मेदवार मञ्जुदेवी गुरुङ भारी मतका साथ बिजयी भईन् । मञ्जुले निकटतम उम्मेदवार काँग्रेसकी सरस्वती गुरुङलाई ११ हजार २ सय २५ मत अन्तरले पराजीत गरेकी हुन् । मञ्जुको कुल ५४ हजार १ सय मत आएको छ भने सरस्वतीले ४२ हजार ८ सय ७५ मत प्राप्त गरिन् । पोखरामा मेयर र उपमेयर छनौट गर्ने यो १५ औं श्रृखंला हो । २०१६ मा पहिलो पटक पोखराको स्थानीय चुनाव भएको थियो ।
कास्कीका लागि स्थानीय निकायमा सबैभन्दा पहिलो जनप्रतिनिधीका रुपमा शिव वहादुर थापा पोखरा नगरपालिकाको मेयर बनेका थिए । साविक पोखरा नगरपालिकामा १० जना प्रधानपञ्चले काम गरे भने एक जना मेयर निर्वाचित भए । २०५२ सालमा उपमहानगरपालिका बनेपछि भएको २०५४ को चुनावमा एमालेकै उम्मेदवार कृष्ण थापा मेयर बनेका थिए ।
स्थानीय निकायको चुनाव हुन छोडेपनि २०६० सालमा तत्कालीन राजा ज्ञानेन्द्रले हर्क बहादुर गुरुङलाई मेयरको रुपमा मनोनयन गरे । २०६२ मा पनि भीमसेन थापालाई राजाले नै मेयरको रुपमा मनोनयन गरेका हुन् ।
करिब २० बर्षपछि भएको स्थानीय चुनावमा एमालेले आफ्नो विरासत कायम राख्दै पोखरा महानगरको नेतृत्वमा कब्जा जमाएको छ । मतगणना सकिएसँगै पोखरामा १ सय ६७ जना निर्वाचित भएका छन् । बाँकी रहेका दलित तथा अल्पसंख्यक समुदायका तीन जना पछि निर्वाचित हुनेछन् । महानगरको २२ वडा एमालेले जितेको छ भने ११ वडा काँग्रेसले जित्यो । बिजेता उम्मेदवारलाई मुख्य निर्वाचन अधिकृतको कार्यालयले आईतबार १ बजे प्रमाणपत्र प्रदान गर्ने जनाएको छ । क्षेत्रफलको आधारमा पोखरा देशकै सबैभन्दा ठूलो महानगरपालिका हो ।
१ | २०१६ | शिवबहादुर थापा | मेयर |
२ | २०१९ | नगेन्द्रबहादुर रायमाझी | प्रधानपञ्च |
३ | २०२४ | अम्बरबहादुर कार्की | प्रधानपञ्च |
४ | २०२८ | रुद्रबहादुर कार्की | प्रधानपञ्च |
५ | २०३१ | दीलिपकुमार पालिखे | प्रधानपञ्च |
६ | २०३२ | रमेशबहादुर भट्टराइ | प्रधानपञ्च |
७ | २०३२ | गणेश शेरचन | प्रधानपञ्च |
८ | २०३८ | श्रीप्रसाद गुरुङ | प्रधानपञ्च |
९ | २०३९ | उत्तम पुन | प्रधानपञ्च |
१० | २०४१ | सूर्यबहादुर केसी | प्रधानपञ्च |
११ | २०४९ | भोला थापा | मेयर |
१२ | २०५४ | कृष्ण थापा | मेयर |
१३ | २०६० | हर्कबहादुर गुरुङ | मेयर |
१४ | २०६२ | भीमसेन थापा | मेयर |
१५ | २०७४ | मानबहादुर जिसी | प्रमुख |