पोखरा, १ वैशाख/पोखरामा जारी सफाइ अभियानमा मुख्यमन्त्री पृथ्वीसुव्वा गुरुङले ऐक्यबद्धता जनाएका छन् । रामघाटमा आयोजित कार्यक्रममा उपस्थित भइ सफाइ अभियानमा सहभागिता जनाएका हुन् । नागरिकस्तरबाट संचालित अभियानमा सरिक हुन पाएकोमा खुशी प्रकट गर्दै उनले यस्तो गरिमामय अभियानलाई निरन्तरता दिन आह्वान गरे ।
कार्यक्रममा मुक्तिनाथ विकास बैंक, ओम डेभलपमेन्ट बैंक र एनआईसी एशिया बैंकले ३/३ वटा राष्ट्रिय झण्डा मुख्यमन्त्रीलाई हस्तान्तरण गरेका थिए भने मुख्यमन्त्रीले राष्ट्रिय सम्पदा संरक्षण समिति नेपाल, नागरिक समाज पोखरा, ड्यामसाइड टोल विकास संस्था, अभियान महिला समूह, खहरे आमा समूह, माछापुच्छे« महिला क्लब, वडा नं. ९ का अध्यक्ष र वडा सचिव एवं हाम्रो क्रिउ स्काउट समूहलाई हस्तान्तरण गरेका थिए ।
यसैबीच, अभियानका संयोजक रामबहादुर पौडेलले वडा नंं ९ र ११ का वडा अध्यक्षहरु रामराज लामिछाने र मोहनप्रसाद बास्तोलालाई सेती नदी किनारमा अवस्थित यस क्षेत्रकै प्राकृतिक र सांस्कृतिक सम्पदाका रुपमा प्रख्यात रामघाटको व्यवस्थापन, उचित संरक्षण, नियमित सरसफाइ लगायत वडा नं. ९ र ११ बाट सेती नदीमा बिसर्जन हुँदैआएको मलमूल एवं दुर्गन्धित तरल पदार्थ अविलम्ब रोक्नेछु भनी प्रतिबद्धता व्यक्त गर्दछु भन्ने व्यहोराको प्रतिबद्धता गराई हस्ताक्षर गराएका थिए ।
कार्यक्रममा विगत लामो समयदेखि सेती नदी बचाउ अभियान संचालनसँगसँगै पोखरा उपत्यका बृहत् सफाइ अभियानमा योगदान पु¥याएकोमा मुख्यमन्त्रीले वडा सचिव एवं सामाजिम अभियन्ता लोकदर्शन कोइरालालाई कलात्मक फ्रेम सहितको प्रशंसापत्र प्रदान गरेका थिए ।
९८ औं हप्ताको कार्यक्रमलाई उद्योग, पर्यटन, वन तथा वातावरणमन्त्री विकास लम्साल, प्रदेशसभा सदस्य कृष्ण थापा र बिन्दुकुमार थापा, पोखरा महानगरपालिकाका मेयर मानबहादुर जिसी, नेपाली सेना, नेपाल प्रहरी, सशस्त्र प्रहरी बल, विभिन्न संघसंस्थाहरु लगायत स्थानीय वडाबासीहरुको उल्लेख्य सहभागिता रहेको अभियन्ता इन्द्रकमल मानन्धरले जनाइन् ।