कृष्ण आचार्य,पोखरा, २९ बैशाख/ पोखराको मनिपाल शिक्षण अस्पतालमा “इमर्जेन्सी न्युरोलोजिकल लाईफ सपोर्ट कोर्ष (ENLS)” सम्बन्धी एक दिने कार्यशाला सम्पन्न भएको छ ।अमेरिकाको न्युरोक्रिटिकल केयर सोसाइटीले बनाएको इमर्जेन्सी न्युरोलोजिकल लाईफ सपोर्ट कोर्ष संम्बन्धी कार्यशाला पोखरामा नै पहिलो पटक शनिबार मनिपाल शिक्षण अस्पतालमा सम्पन्न भएको हो ।
उक्त कार्यशालामा बिभिन्न न्युरोलोजिकल र न्युरोसर्जिकल रोग संम्बन्धी समस्या र उक्त रोगको समाधानको बिषयमा छलफल भएको कार्यक्रम संयोजक एवं मनिपाल शिक्षण अस्पताल न्युरोसर्जरी बिभागका प्रमुख डाक्टर बालगोपल कर्मचार्यले जानकारी दिए । बिशेष गरी टाउको र मस्तिष्कको चोटपटक, मेरुडण्डको चोटपटक, मस्तिष्क पक्षघात, ब्रेन हेमोरेज, छारेरोग, मस्तिष्क र मेरुडण्डको संक्रमण तथा ट्युमरको लक्षण लिएर आएका बिरामीलाई सुरुको अवस्थामा तत्काल के कस्ता निदानका उपायाहरु गर्ने र उपचार कसरी गर्ने भन्ने बिषयमा कार्यशालामा बिशेष छलफल भएको पनि डाक्टर कर्मचार्यले जानकारी दिए।
कार्यशालामा सहभागीहरुलाई कार्यक्रम संयोजक डाक्टर कर्मचार्य सहित महाराजगंज शिक्षण अस्पताल काठमाण्डौंका न्युरोक्रिटीकल बिशेषज्ञ डाक्टर जेन्टल सुन्दर श्रेष्ठ र डाक्टर प्रज्ञा आचार्य, न्युरो अस्पताल बासबारी काठमाण्डौंका डाक्टर मयुश बहादुर मुनान्कामी र डाक्टर सुवाश लोहोनी, मनिपाल शिक्षण अस्पतालका डाक्टर निकुञ्ज योगी र डाक्टर हरि पौडेलले प्रशिक्षण दिएका थिए । कार्यशालमा पोखराका बिभिन्न अस्पतालको आकस्मिक कक्ष, आई सी यू र न्युरो आई सी यू मा कार्यरत ८३ जना चिकित्सक , नर्स र स्वास्थ्यकर्मीहरुको सहभागिता रहेको थियो ।