पोखरा, १ असोज / पोखराको सिद्धार्थचोकमा रहेको एक्सपर्ट एजुकेसन एण्ड भिजा सर्भिसेसको आयोजनामा
अन्तरकलेज निवन्ध प्रतियोगिता सम्पन्न भएको छ । प्रतियोगितामा पोखराका विभिन्न कलेजका २१ जना विद्यार्थी
सहभागी भएको एक्स्पर्टका पब्लिक रिलेसन अफिसर तथा बजार प्रमुख विष्णुप्रसाद गौतमले जानकारी दिए ।
‘वैदेशिक शिक्षाः अवसर र चुनौति’ विषयमा प्रतियोगिता आयोजना गरिएको हो । प्रतियोगिताको नतिजा असोज ८
गते एक्स्पर्टको सभाहलमा हुने ‘ग्राण्ड अष्ट्रेलियन एजुकेसन सेमिनार’का अवसरमा सार्वजनिक गरिने एक्सपर्टका
सञ्चालक रमेश थापाले जानकारी दिए ।
प्रतियोगितामा प्रथम, द्वितीय र तृतीयलाई क्रमशः १५ हजार, १० हजार र ५ हजार रुपैयाँ नगदसहित मेडल र
प्रमाणपत्रबाट पुरस्कृत गरिनेछ । प्रतियोगितामा सहभागी अन्य विद्यार्थीलाई पनि अवार्ड प्रदान गरिने बताइएको छ ।
यसैबीच, पोखराका ३८ वटा कलेजका उत्कृष्ट विद्यार्थीलाई एक्स्पर्टले सेमिनारकै अवसरमा सम्मान गर्ने भएको छ ।
उत्कृष्ट विद्यार्थीलाई प्रोत्साहन गर्ने लक्ष्यले नगद, मेडल र प्रमाणपत्रले सम्मान गर्न लागिएको थापाले जानकारी दिए
। सेमिनारमा अष्ट्रेलियाका १५ भन्दा धेरै युनिभर्सिटी तथा कलेजका प्रतिनिधि सहभागी हुने थापाले बताए ।