श्याम राना
पोखरा, १० भदौ / आज श्रावण शुक्ल पुर्णिमा । अर्थात, आत्माको शुद्धिकरण र शरीरको रक्षाका लागि ब्राह्मण
पुरोहितको हातबाट नाडीमा रक्षाबन्धन बाँध्ने दिन । देश भरका मन्दिर, पिठहरुमा भव्यताका साथ मनाइँदै छ ।
यस्तै पोखराको मन्दिर विन्ध्यवासिनीमा पनि भव्यताका साथ रक्षाबन्धन मनाइँएको छ । बिहानै देखि श्रद्धालु
भक्तजन र रक्षावन्धन बाँध्नेको घुइँचोले मन्दिर परिसर भरिएको छ । जनैपुर्णिमाको पृष्ठभुमि र धार्मिक
महत्वबारे बोल्दै मन्दिरका पुजारी नारायण देवकोटाले विशेष गरि सनातन ब्राह्मण समुदायले यो पर्व मनाउँदै
आएको बताए ।
प्रातकालमा गंगामा गई नुहाएर भष्म, गौ मुत्र, गौ दन्ड, अष्ट गंगा आदिले संस्कारीत भई, नयाँ योग्य
पबितालाई धारण गर्ने उनले बताए । रक्षाबन्धन बाँध्नाले वायुमण्डलमा रहेको फोहोरबाट लाग्ने रोगबाट बच्ने
विश्वासले रक्षाबन्धन बाँध्ने चलन रहेकोे उनको भनाई थियो ।
रक्षाबन्धन बाँध्न मन्दिर आएका पुर्ण श्रेष्ठले जनै लगाउँने र रक्षाबन्धनको प्रचलन बिस्तारै घट्दै गई रहेको
बताए । यसको लागि युवालाई नै सक्रिय गराउनुपर्ने उनको भनाई थियो । विन्ध्यवासिनी धार्मिक क्षेत्र विकास
समितिका कार्यालय सचिव नवराज तिमिल्सिनाले विगतका तुलनामा भक्तजनहरु कम भएको बताए ।
भक्तजनहरु आफुलाई पायक पर्ने मन्दिर साथै वर्षायामको समय भएकाले पनि विगतका ३,४ वर्षको तुलनामा
भक्तजन घटेको उनको भनाई थियो ।
तागाधारीले कश्यप, अत्रि, भारद्वाज, गौतम, जमलग्नि, विश्वामित्र र अरुन्धतीसहित सप्तऋषिलाई तर्पण दिने
भएकाले पनि जनैपुर्णिमालाई अर्को अर्थमा ऋषि तर्पण भन्ने गरिन्छ । यसै दिन ब्राह्मणहरुले पुरानो जनै फेरेर
नयाँ लगाउँने चलन छ ।
पाटनको कुम्भेश्वर, रसुवाको गोसाइँकुन्ड, नुवाकोटको देवीघाट लगायतका धार्मिक क्षेत्रमा पनि मेला लाग्ने गर्छ
। मास, भटमास, केराउ, मुग, सिमी, गुराँस र बोडी गरी ९ थरिका गेडागुडी मिसाएर बनाइएको क्वाटी पनि आजै
खाने चलन छ ।