पोखरा, २३ भदौ / बंगलादेशमा जारी साफ च्याम्पियनसिप २०१८ मा घरेलु टोली बंगलादेशलाई २ – ० गोल
अन्तरले हराउँदै नेपाल साफ च्याम्पियनसिपको सेमिफाइनलमा प्रबेश गरेको छ । नेपाल समूह विजेता बन्दै
सेमिफाइनलमा प्रबेश गरेको हो । नेपालको जितमा बिमल घर्तिमगर र नवयुग श्रेष्ठले एक एक गोल गरे ।
खेलको ३३ औं मिनेटमा बिमल घर्तिमगरले गोल गर्दै नेपाललाई सुरूवाती अग्रता दिलाएका थिए ।
सुनिल बललाई वाले फैजले फाउल हानेपछि नेपालले फ्रिकिक पाएको थियो । उक्त मौकालाई बिमलले पोलको
दिशा दिएका हुन् । विमलको प्रहार हातमा आइसकेको बल घरेलु टोलीका गोलकिपर मोहम्मद साहिदुल आलमले
फुत्याएपछि गोल भएको थियो ।
पहिलो हाफ १-० ले अघि रहेको नेपालले दोस्रो हाफको अन्तिम मिनेटमा नवयुग श्रेष्ठले गोल गर्दै नेपालको जित
निश्चित पारे । ६७ औं मिनेटमा भरत खवासलाई प्रतिस्थापन गरेका नवयुगले विशाल राईको पासलाई सदुपयोग
गरेका थिए । अघिल्लो खेलमा भुटानलाई हराउँदै पाकिस्तान प्रतियोगिताको सेमिफाईनल पुगेपछि नेपाललाई
जित्नैपर्ने दबाब थियो ।
यो जितसँगै नेपाल ६ अंकसहित समूह विजेताको रुपमा सेमिफाइनल प्रवेश गरेको हो । पाकिस्तान र
बंगलादेशको पनि समान ६६ अंक भए पनि पाकिस्तान उपविजेता बन्दै सेमिफाइनल पुग्यो । नेपाल, बंगलादेश
र पाकिस्तानको समान ६ अंक भएपछि तीन टोलीबीचको नतिजा हेरिएको थियो । तीन टोलीको खेलमा
गोलअन्तरका आधारमा नेपाल अगाडि भएपछि समूह विजेता बन्दै सेमिफाइनल प्रवेश गरेको हो ।
यो सँगै सन् २०१३ पछि नेपाल पहिलो पटक सेमिफाइनल पुगेको हो ।