पोखरा । साथीको हत्या गरेर फरार भएका १ जनालाई प्रहरीले तनहुँबाट पक्राउ गरेको छ ।
चुरोटको विषयमा झगडा हुँदा कृष्ण चौधरीलाई हत्या गरेर फरार भएका सिन्धुलीको सुनकोशी गाउँपालिका १ कुशेश्वर दुम्जा घर भई हाल पोखरा ६ बसुन्धरापार्क बस्दै आएका २३ वर्षीय प्रेम भनिने नन्दलाल श्रेष्ठलाई प्रहरीले पक्राउ गरेको हो ।
प्रहरीले दिएको जानकारी अनुसार नन्दलालले असोज २२ गते राति करिब साढे ८ बजेको समयमा पोखराको बसुन्धरा पार्कमा अन्दाजी २४/२५ वर्षीय चौधरीलाई ढुंगाले हानेर हत्या गरेका थिए । उनलाई प्रहरीले तनहुँको आँबुखैरेनीबाट पक्राउ गरेको हो ।
रिक्सा लिएर काठमाडौं जाँदै गर्दा उनी पक्राउ परेका हुन् ।
घटना विवरण
गत असोजमा नन्दलाल कामको खोजीका लागि सिन्धुलीबाट रिक्सा सहित पोखरा आएका थिए । उनले पोखराका लेकसाइड, बसुन्धरापार्क, पृथ्वीचोक सहित विभिन्न स्थानमा कवाडी संकलन गरेर बेच्ने काम गर्थे । काम गर्ने क्रममा नै दाङको घोराही घर बताउने कृष्णसंग नन्दलालको हत्या गरेको दिनमा नै बसुन्धरा पार्कमा भेट भएको थियो ।
प्रहरीका अनुसार भेटका क्रममा उनीहरुबीच सामान्य कुराकानी समेत भएको थियो । सो क्रममा नन्दलाल र कृष्णले मादकपदार्थ सेवन गरेका थिए । मादक पदार्थ सेवन पश्चात कृष्णले नन्दलाललाई ‘मेरी श्रीमतीले खाना बनाएकी छिन्, खान जाउँ ।’ भनेर पार्कमा रहेको प्रतीक्षालयमा बसेर संगै खाना खाएका थिए ।
खाना खाने क्रममा कृष्णकी श्रीमतीले चुरोट हरायो भनेकी थिइन् । त्यसपछि कृष्णले नन्दलाललाई तिमीले किन चुरोट चोरेको भन्दै प्रश्न गरेका थिए । चुरोट चोरेको विषयमा नै कृष्ण तथा नन्दलालबीच धकेलाधकेल समेत भएको थियो । धक्कामुक्कीकै समयमा कृष्णले नन्दलालको पेटमा समातेर उनलाई धकेल्दै परसम्म पु¥याए ।
त्यसपछि कृष्णले नन्दलाललाई आगो बाल्ने ढुंगा टिपेर हिर्काउन खोज्दा नन्दलालले सोही ढुंगा खोसेर ३ पटकसम्म कृष्णलाई हिर्काएका थिए । नन्दलालले कृष्णलाई ढुंगा प्रहार गरेपछि गम्भीर घाइते भएका उनलाई प्रहरीले उपचारका लागि पश्चिम क्षेत्रीय अस्पतालमा पठाएको थियो । अस्पतालमा उपचार कै क्रममा कृष्णले ज्यान गुमाएका थिए ।