म्याग्दी । म्याग्दीको रघुगंगा गाउँपालिका ३ मौवाफाँटमा सुविधासम्पन्न १० बेडको अस्पताल निर्माण गरिने भएको छ । नेपाल सरकारले १ स्थानीय तहमा १ अस्पताल बनाउने अवधारणाअनुसार गाउँपालिकाको केन्द्रसमेत रहेको मौवाफाँटमा अस्पताल बनाउने निर्णय गरिएको हो ।
संघीय सरकारको स्वास्थ्य तथा जनसङ्ख्या मन्त्रालयमार्फत प्राप्त बजेटबाट निर्माण गरिने अस्पतालको लागि मौवाफाँटमा जग्गा व्यवस्थापनसहित आवश्यक प्रक्रिया अघि बढाउने निर्णय भएको प्रमुख प्रशासकीय अधिकृत अमृत सुवेदीले जानकारी दिएका छन् । उनका अनुसार, कार्यपालिका बैठकबाट सर्वसम्मत रुपमा पालिकाभित्रका बहुसंख्यक नागरिकलाई पायक पर्ने गरी गाउँपालिकाको केन्द्र रहेकै स्थानमा अस्पताल निर्माण गर्ने निर्णय भएको छ ।
कूल १० करोड बढी लागत अनुमान गरिएको अस्पताल निर्माणमा चालू आवका लागि ८५ लाख बजेट प्राप्त भएको छ । यसअघि संघीय सरकारमार्फत रघुगंगा–१ बेगखोलामा स्वास्थ्य चौकी विस्थापन गरी अस्पताल निर्माण गर्ने योजना स्वीकृत भएको थियो । तर यसैवर्षदेखि राष्ट्रिय पुनःनिर्माण प्राधिकरणमार्फत बेग स्वास्थ्य चौकीको पुनःनिर्माणको काम अघि बढेको कारण एकै स्थानमा एकै प्रकारका २ योजना अघि बढाउनु उपयुक्त नभएको सो स्थान अधिकांश वडाको लागि अपायक पर्ने भएकाले अस्पताललाई गाउँपालिकाको केन्द्रमा निर्माण गर्ने निर्णय भएको जनाइएको छ ।
‘१ स्थानीय तहमा १ मात्रै अस्पताल बन्ने मापदण्ड रहेछ, बेगमा अस्पताल हुँदा गाउँपालिकाका बहुसंख्यकलाई अपायक पर्ने देखियो, त्यसैले अस्पताल केन्द्रमा बनाउँदा उपयुक्त हुन्छ, बेगको स्वास्थ्य चौकी पनि पुनःनिर्माणको काम अघि बढेको छ, त्यहाँका जनताले पनि सरल र सहज रुपमा स्वास्थ्य सेवा पाउँछन् ।’, गाउँपालिका अध्यक्ष भवबहादुर भण्डारीले भने ।
गाउँपालिकाले यसअघि वडा नम्बर १ को बाँदुकमा समेत स्वास्थ्य एकाइ स्थापना गरिसकेको छ । बेगखोलामा स्वास्थ्य चौकी पुनःनिर्माणका लागि १ करोड ३५ लाख बजेटबाट पुनःनिर्माण प्राधिकरणमार्फत काम अघि बढेको गाउँपालिकाले जनाएको छ । रासस