लमजुङ । गण्डकी प्रदेशअन्तर्गत लमजुङ–मनाङ जिल्ला जोड्ने ६५ किलोमिटरको बेसीसहर–चामे सडकको नाम ‘राष्ट्रकवि मार्ग’ राख्न एक कार्यक्रमका सहभागीले माग गरेका छन् । मस्र्याङ्दी गाउँपालिका–६ पुस्तुनमा पुस्तुन बाहुनडाँडा घिमिरे समाजद्वारा आज राष्ट्रकवि माधवप्रसाद घिमिरेको १३ औंं दिनका पुण्यतिथिमा आयोजित श्रद्धाञ्जली कार्यक्रममा सो माग गरिएको हो ।
पुस्तुनमा जन्मी राष्ट्रिय–अन्तरराष्ट्रिय क्षेत्रमा चर्चित घिमिरेका नामबाट बेसीसहर–चामे सडकको नाम राख्न सकेमा उनको योगदान र जन्मथलोप्रति सम्मान जनाइएको छ ।
पुस्तुन बाहुँनडाँडा–घिमिरे समाजका अध्यक्ष प्रेमनाथ घिमिरे, सोही गाउँपालिका वडा नम्बर ६ का वडाध्यक्ष लीलाप्रसाद घले, घिमिरे समाजका संस्थापक अध्यक्ष भक्तबहादुर घिमिरे, राष्ट्रकवि माधवप्रसाद घिमिरे उद्यान निर्माण समितिका अध्यक्ष चन्द्रकान्त घिमिरे, बाघेता युनाइटेड क्लबका अध्यक्ष विष्णु गुरुङलगायत समाजसेवी, जनप्रतिनिधि, स्थानीयवासी लगायतले सो माग गरेका हुन् ।
मस्र्याङ्दी गाउँपालिकाका अध्यक्ष अर्जुन गुरुङले मनाङ तथा लमजुङका जनप्रतिनिधि र सरोकार निकायसँंग सल्लाह र समन्वय गरी सोका लागि पहल गरिने बताएका छन् ।
कार्यक्रममा राष्ट्रकविको तस्बिरमा सहभागीले फूल, अबीर र माला अर्पण गरी श्रद्धाञ्जली व्यक्त गरेका थिए । विक्रम संवत् १९७६ असोज ७ गते हालको मस्र्याङ्दी गाउँपालिका बाहुनडाँडास्थित पुस्तुनमा जन्मिएका उनको यही भदौ २ गते काठमाडौं लैनचौरस्थित आफ्नै निवासमा १ सय १ वर्षका उमेरमा निधन भएको थियो ।
उनका नवमञ्जरी, गौरी (शोककाव्य), मालती मंगले, (गीतिनाटक), हिमालपारी हिमालवारी (गीतिनाटक, साझा पुरस्कार २०५४), राजेश्वरी, इन्द्रकुमारी, राष्ट्रनिर्माता, किन्नरकिन्नरी (गीतसंग्रह), चारु चर्चा (निबन्ध, साझा पुरस्कार २०५८), आफ्नो बाँसुरी आफ्नै गीत (निबन्ध) लगायत कृति प्रकाशित छन् । घिमिरेले २०६७ सालमा पद्मश्री साधना सम्मानसमेत प्राप्त गरेका थिए । घिमिरेलाई विसं २०६० मा ८५ वर्षका उमेरमा राष्ट्रकविको उपाधी दिइएको थियो । उनलाई २०७४ सालमा नेपाली सेनाको मानार्थ सहायक रथीको पदवीसमेत प्रदान गरिएको थियो ।
उनका ‘गाउँछ गीत नेपाली…’, ‘नेपाली हामी रहौंला कहाँ नेपालै नरहे…’ साथै तारादेवीले गाएको’ मनको बाँध’ चलचित्रको’ फूलको थुँगा बगेर गयो’ तथा नारायणगोपालले गाएको ‘आजै र राति के देखें सपना’जस्ता गीत चर्चित छन् । रासस