पोखरा, २५ माघ / पोखरा उद्योग वाणिज्य संघले वित्तीय संस्थाहरुसँग ऋण लिँदा कबुलेकोभन्दा बढी ब्याज नतिर्ने निर्णय गरेको छ । संघले कबुलेभन्दा बढी ब्याज तिर्न असमर्थ रहेकोबारे बैंक तथा वित्तीय संस्थाहरुको छाता संस्थालाई जानकारी गराउने, नेपाल सरकार तथा नेपाल राष्ट्र बैंकलाई अहिले देखिएको समस्या समाधानको लागि गुहार्ने र जिल्ला /नगर उद्योग वाणिज्य संघ, नेपाल उद्योग वाणिज्य महासंघलगायतका संघ/संस्थाहरुलाई समस्याबारे अवगत गराउँदै साझा धारणाका साथ दवाबमूलक कार्यक्रम संचालन गर्ने एवं अहिले उत्पन्न समस्या समाधानको लागि सार्वजनिक संचारमाध्यममार्फत अनुरोध गर्ने निर्णय समेत गरेको छ ।
बैंक तथा वित्तीय संस्थाहरुले आफ्नो लगानीमा एक्कासी ब्याज बृद्धि गरेपछि उत्पन्न परिस्थितिबारे छलफल गर्न मंगलबार आयोजित अन्तरक्रियापछि सो निर्णय लिएको हो । अन्तरक्रिया कार्यक्रममा पोखराका उद्योगी÷व्यवसायीहरुको बाक्लो उपस्थिति रहेको थियो । सो अवसरमा कार्यक्रमको विषयबस्तुबारे प्रष्ट पार्दै संघका अध्यक्ष विश्वशंकर पालिखेले एक्कासी ब्याज थोपरिनु भनेको ऋण लिँदा गरिएको तमसुकमा ‘बैंकले चाहे एकतर्फी रुपमा नै ब्याजदर बढाउन सक्नेछ’ भन्ने वाक्याशंमा टेकेर एकतर्फी रुपले ब्याज बढाइनु ऋणीलाई अप्ठेरोमा पारेर ‘मृत्युपत्रमा’ हस्ताक्षर गराउनु जस्तै भएको तर्क गर्नुभयो ।
‘बैंकहरुले एक्कासी लगानीमा ब्याजदर बढाउँदा हामीले हिजो तयार पारेका परियोजनाहरुको लागत बढ्न गएको छ’, उहाँले भन्नुभयो,‘ निश्चित योजनाका साथ तयार गरिएका परियोजनामा लागत बढ्दा र त्यसले उचित प्रतिफल नपाउँदा के परिणति भोग्नुपर्छ भन्ने उदाहरणको लागि टाढा जानै पर्दैन, वरिपरिका लगानीकर्ताको अवस्था हेरे हुन्छ । ’ उहाँले वित्तीय संस्थाहरुमा रहेको बचतको ५० प्रतिशतभन्दा बढी रकम सेना, संचयकोष, दूरसंचार लगायतका सरकार मातहतका निकायहरुको रहेको बताउँदै अहिलेको अवस्थामा त्यस्तो बचतलाई निश्चित दायरामा राख्न नेपाल राष्ट्र नेपाल राष्ट्र बैंकलाई सुझाव पनि दिनुभयो ।
उहाँले वित्तीय संस्थाहरुले मर्जरमा जानुको सट्टा आफै एफ. पि. ओ. जारी गर्दा सो मा भएको लगानी लामो समयसम्म बैंकको ढुकुटीमै थन्किन पुग्दा तरलता बढेको तर्क गर्दै एफ. पि. ओ. जारी गरे पश्चात तुरुन्ता तुरुन्तै सेयर बिक्री गरी बाँकी रहेको रकमलाई पुन ः हुनुपर्नेमा जोड दिनुभयो । पोखरा उद्योग वाणिज्य संघका महासचिव दामु अधिकारीको संचालन रहेको कार्यक्रममा संघका निवर्तमान अध्यक्ष विन्दुकुमार थापा, कार्यसमिति सदस्य प्रेमबहादुर भुजेल, नरेन्द्र बास्तोला,व्यवसायीहरु अम्बर तुलाचन, रामबहादुर केसी, रमेश पौडेल, चिरञ्जिवी पोखरेल, कमल न्यौपाने, कालिदाश पौडेल,केशवबहादुर खत्री,धनीराम बराल, गणेश थापा, झवी अधिकारी,संगीता पौडेललगायते बैंक तथा वित्तीय संस्थाहरुले एकतर्फी रुपले ब्याज बढाएर व्यवसायीहरुको ढाड सेकेको बताउनुभयो ।