पोखरा, १९ चैत/ उत्तर भारतमा हालै संचालन गरिएको चलिय पोखरा अभियान भव्य सफल भएको भन्दै पोखरेली होटलकर्मीले यस्तो अभियानलाई आगामी वर्षहरुमा पनि निरन्तरता दिने बताएका छन् । पश्चिमाञ्चल होटल संघ पोखराले नेपाल पर्यटन बोर्डसँग मिलेर चलिए पोखरा अभियान संचालन गरेको हो ।
नेपालबाट नजिक पर्ने कानपुर, लखनउ, बनारस र गोरखपुर चैत १३ देखि १८ गते सम्म अभियान संचालन गरिएको थियो । अभियानको क्रममा भारतीय पर्यटन व्यवसायी र त्यहाँका नागरिकले पोखरा र नेपालप्रति विशेष चासो राखेको संघका अध्यक्ष भरतराज पराजुलीले जानकारी दिए । चार वर्ष अघि नै संघले सुरु गरेको यो अभियानलाई विगत वर्षहरुमा जस्तै यो वर्ष पनि निरन्तरता दिइएको हो । यस्तो निरन्तरताको प्रभाव निकै सकारात्मक परेको भन्दै आगामी वर्षहरुमा पनि संघले अभियानलाई निरन्तरता दिने निर्णय गरेको अध्यक्ष पराजुलीले बताए ।
अभियानमा पोखराका होटलकर्मी, संचारकर्मी र नेपाल पर्यटन बोर्डका अधिकारी गरी २५ जनाको सहभागिता रहेको संघका उपाध्यक्ष विकल तुलाचनले जानकारी दिए । कानपुरमा आयोजित पत्रकार सम्मेलनमा बोल्दै नेपाल पर्यटन बोर्ड पोखराका प्रमुख उदय भट्टराईले भूकम्प र नाकाबन्दीले प्रभावित भएको नेपाली पर्यटन विस्तारै जाग्दै गरेको भन्दै भारतीय नागरिकलाई नेपाल भ्रमणको आग्रह गरे ।
कानपुर स्थित ट्राभल होलिडेजका प्रबन्धक विश्वास सक्सेनाले भारतीय बजारमा नेपाली व्यवसायीले गरेको बजारिकरणको शैलीबाट आफू प्रभावित भएको भन्दै बढी भन्दा बढी भारतीय नेपाल पठाउन आफूले पहल गर्ने भनाई राखे । यसैगरी लखनउमा आयोजित कार्यक्रममा ट्राभल ब्यबसायी सुशील तिवारीले नेपाल भारत नाकामा भारतीय पर्यटक बोकेका सवारीलाई सहज प्रवेश र नेपालमा गुड्न पनि कुनै समस्या नपर्ने व्यवस्था गर्न माग गरे । लखनउमा व्यवसायीले नेपालका पर्यटन व्यवसायीले भारतीय पर्यटकका लागि एउटा हटलाइन नम्बर व्यवस्था गर्न पनि सुझाव दिए ।
पोखराबाट उत्तर भारतका शहरहरु नजिक भएको, भारतमा अहिले निकै गर्मी रहेको र त्यो गर्मी छल्ने उपयुक्त स्थल पोखरा रहेको तथा प्राकृतिक सुन्दरता हेर्दै सस्तो दरमा नै पोखरामा बसोबास र घुमघान गर्न सकिने कार्यक्रममा बताइएको थियो । हनिमुन प्याकेज, शैक्षिक भ्रमण प्याकेज, समर प्याकेज र धार्मिक यात्रा प्याकेज जस्ता छनौटहरु पनि कार्यक्रममा पोखरेली होटलकर्मीले सार्वजनिक गरिएको थियो । पोखरा घुम्न आउने भारतीय पर्यटकलाई होटलका विस्तारामा २० प्रतिशत छुटको पनि सोही अवसरमा घोषणा गरिएको थियो । बोर्डर टाउन सेल्स मिसन नामबाट संचालित यो अभियानको क्रममा नेपाल र भारतका पर्यटन व्यवसायीहरु विजनेस टु विजनेस कुराकानीमा पनि सहभागी भएका थिए ।
बनारसमा अयोजित कार्यक्रममा बाराणासी होटल संघका अध्यक्ष देवेन्द्रनारायण सिंहले आफूहरु पोखरा भ्रमण गर्न आतुर रहेको बताउँदै बढी भन्दा बढी भारतीय पर्यटक नेपाल पठाउन आफूले पहल गर्ने भनाई राखे । मन्त्रीहरु राजपाल कश्यप र नफिस अहमदले पोखरा सम्बन्धी तस्वीर र दृश्य हेरेपछि लखनउबासीलाई पोखरा घुम्न आग्रह गरेका थिए ।
अभियानको क्रममा चैत २८ देखि वैशाख २ गतेसम्म संचालन गरिने १३ औं फेवा नव वर्ष महोत्सबारे पनि जानकारी गराइएको थियो । अन्तिम दिन नेपाल प्रवेशसँगै भैरहवामा आयोजित कार्यक्रममा फेवा नव वर्ष महोत्सव र चलिए पोखरा अभयानबारे जानकारी दिंदै लुम्बिनी अंचल बासीलाई पोखरा भ्रमणको निम्ता प्रदान गरिएको संघका महासचिव भेकेन्द्रकुमार श्रेष्ठले जानकारी दिए ।
चलिए पोखरा अभियानका संस्थापक एवं संघका पूर्व अध्यक्ष विप्लव पौडेलले अभियान सफल रहेको भन्दै अन्य देशमा पनि पोखरा सम्बन्धि प्रचारका कार्यक्रम अगाडि बढाइने बताए । भैरहवामा आयोजित कार्यक्रममा सिद्धार्थ नगर होटल संघका अध्यक्ष चन्द्रप्रकाश श्रेष्ठले पोखरा र लुम्बिनीबा व्यवसायी मिलेर पर्यटन प्रवद्र्धनका काम अगाडि बढाउनुपर्ने भनाई राखे । भ्रमणमा सहभागी सिद्धार्थ एशोसिएशन अफ ट्राभल एजेन्ट्सका अध्यक्ष सागर अधिकारी र भैरहवा स्थित नेपाल भारत मैत्री संघका अध्यक्ष श्रीचन्द गुप्ताले भ्रमण सफल भएकोमा खुसी व्यक्त गरे ।