एजेन्सी । दक्षिण कोरियामा कोरोना (कोभिड– १९) का संक्रमितको संख्या पछिल्लो समयमा केही घटेको देखिएको छ । यहाँका स्वास्थ्य अधिकारीहरूले संक्रमित हुनेहरूको संख्यामा पछिल्ला सातामा केही कमी आएको जनाएका छन् ।
प्राप्त समाचारअनुसार पछिल्लो २४ घन्टामा यहाँका ३ सय ८८ जनामा कोरोना भाइरसको संक्रमण भेटिएको छ । यो संख्या यहाँ केही दिन यताको भने कम देखिएको छ । योसँगै यहाँ संक्रमितहरूको संख्या ९१ हजार ६ सय ३८ जना पुगेको पनि बताइएको छ ।
कोरियामा पछिल्लो साता हरेक दिन संक्रमितको संख्या ४ सयभन्दा तल झरेको छ । तर यो संख्या ३ सयदेखि ४ सयसम्म रहेको पनि बताइएको छ । गएको २४ घन्टामा यहाँ ३ सय ८८ जना संक्रमित थपिएका हुन् ।
उनीहरूमध्ये केही विदेशबाट आएका व्यक्ति हुन् । यसैगरी यहाँ पछिल्लो २४ घन्टामा ८ जना व्यक्तिको ज्यान गएको छ । योसँगै कोरियामा कोरोना संक्रमणबाट ज्यान जानेको संख्या १ हजार ६ सय २७ जना पुगेको छ ।
दक्षिण कोरिया सरकारले कोरोना भाइरस संक्रमण रोक्न प्रभावकारी काम गरेको भन्दै सुरुका दिनहरुमा यहाँ यो भाइरसको संक्रमण बढेको थिएन । पछिल्ला हप्ताहरुयमा यहाँ यो भाइरसको संक्रमण बढेको भए पनि पछिल्ला केही दिनमा भने कम भएको देखिएको छ ।
दक्षिण कोरियाका स्वास्थ्यसम्बन्धी अधिकारीहरूले दिएको जानकारीअनुसार कोरोना संक्रमितमध्ये १.७८ प्रतिशतको ज्यान गएको बताइएको छ । यहाँको सरकारले करिब ७० लाख नागरिकमा कोभिड संक्रमणको परीक्षण (पिसिआर) गराएको जनाएको छ । रासस