म्याग्दी । अन्नपूर्ण गाउँपालिका वडा नम्बर ५ खोपारामा सहकारी संस्थामार्फत् होटल सञ्चालन गरिएको छ । खोपारामा ४० जना क्षमताको २० कोठे होटल सञ्चालन गरेको पाउद्वार पर्यटन सहकारी संस्थाले पदमार्ग सुरु गर्ने तयारी गरेको छ ।
पर्यटनको लाभ समुदायमा पु¥याउन नेपालमै पहिलो पटक नयाँ अवधारणामा होटल सञ्चालन गरिएको सहकारीका अध्यक्ष राजेश तिलिजा पुनले बताएका छन् । ‘राष्ट्रिय आविष्कार केन्द्रका अध्यक्ष महावीर पुनको अवधारणाअनुसार नेपालमै पहिलो सहकारीबाट होटल चलाएका हौं ।’ उनले भने, ‘पाउद्वारलाई केन्द्रित गरेर वरपरका पर्यटकीयस्थललाई समेटेर नयाँ पदमार्ग सञ्चालनको तयारी गरेका छौं ।’
यसअघि पाउद्वार मावि र हिमाञ्चल माविले खोपारा लेकमा सञ्चालन गर्दै आएको सामुदायिक होटललाई सहकारी मातहत ल्याइएको हो । होटलका संरचनाको मूल्यांकन गरेर २५ प्रतिशत पाउद्वार माविका निजी स्रोतका शिक्षकको तलबका लागि अक्षयकोष बनाउने सम्झौता भएको छ । गाउँपालिकामा पहिलो पटक दर्ता भएर यही फागुन ११ गतेदेखि सञ्चालन भएको सहकारीमा हाल पाउद्वारका १ सय २३ जनाले ८८ लाख सेयर लगानी गरेका छन् । गाउँमा बचत, ऋण लगानी र आर्थिक क्रियाकलापका साथै होटलमा जनशक्ति परिचालन गर्नेदेखि आम्दानी खर्चको विवरण सबै सहकारीमार्फत् गरिने भएको छ ।
होटलको आम्दानीलाई सञ्चालन खर्च कटाएर मुनाफाका रुपमा सेयर सदस्यलाई वितरण गरिनेछ । विद्यालय अन्तर्गत सञ्चालन गर्दा व्यवस्थापनमा समस्या देखिएपछि सहकारी मातहत ल्याइएको अध्यक्ष तिलिजाले बताए ।
विसं २०७६ मंसिर महिनादेखि प्रस्तावित सहकारीलाई होटल व्यवस्थापनको जिम्मा लगाइएको थियो । सहकारी मातहत आएको १ वर्षको अवधिमा होटलले ३१ लाखको कारोवार गरेको छ ।
१२ कोठे होटलको क्षमताले पाहुनाको चाप थेग्न नसकेपछि २६ लाख खर्चेर ८ कोठे नयाँ भवन निर्माण गरेर क्षमता बढाएका छन् । पहाडको शिरमा भिरालो भूगोलमा अवस्थित खोपाराबाट सूर्योदय, हिमाल, वनजंगलको मनोरम दृष्य अवलोकन गर्न सकिन्छ । खोपारा क्षेत्रमा परिएको चौरी र भेडापालन यहाँको थप आकर्षण भएको सामुदायिक लजका कर्मचारी आदेश तिलिजाले बताएका छन् । रासस