काठमाडौं । चिकित्सा क्षेत्र नै सुधार गर्नुपर्छ भन्दै १९ औ पटकसम्म सत्याग्रह छेडेका डाक्टर गोविन्द केसीलाई कोरोना संक्रमण भएपछि काठमाडौस्थित टिचिङ अस्पतालमा उपचाररत छन् । शुक्रबार कोरोना रिर्पोट पोजेटिभ आएका उनको स्वास्थ्यलाभको कामना देश विदेशबाट धेरै नेपालीले सामाजिक सञ्जालमार्फत गरे ।
प्रधानमन्त्री केपी शर्मा ओलीले पनि ट्वीटरमार्फत केसीलाई स्वास्थ्यलाभको कामना गर्दै उनको उपचार खर्च सरकारले बेहोर्ने घोषणा गरे । तर त्यसको केही घण्टाभित्रै केसीले भने विज्ञप्ति जारी गर्दै आफ्नो उपचार आफै गर्ने जवाफ दिए ।
शनिबार जारी उनको विज्ञप्तिमा विपन्न र दूरदराजका संक्रमितले उपचार नपाएको अवस्थामा व्यक्ति विशेषको उपचार बेहोर्नुभन्दा विपन्न नागरिकको उपचार खर्च व्यहोर्नमा सरकारको ध्यान जानुपर्ने बताइएको छ ।
त्यस्तै चिकित्सा क्षेत्र सुधारका लागि गरेको १९ औं सत्याग्रह तोड्ने क्रममा भएका सम्पूर्ण सम्झौता यथाशीघ्र कार्यान्वयन गर्न पनि विज्ञप्तिमा अनुरोध गरिएको छ ।
विगतमा भएका सम्झौता कार्यान्वयन नहुँदा अहिलेको स्थिति आएकोतर्फ इंगित गर्दै उनले भनेका छन्, ‘हामीसँग पटक–पटक गरिएका सम्झौता कार्यान्वयन भएको भए देशका दूरदराजदेखि सबै भेगमा ठूला सरकारी अस्पताल मेडिकल कलेज बन्ने थिए ।
त्यस्तै विज्ञप्तिमा भनिएको छ, ‘त्यहाँका नागरिकले कोरोनाका साथसाथै सम्पूर्ण रोगको गुणस्तरीय, निशुल्क, सर्वसुलभ स्वास्थ्य सेवा पाउने थिए । तसर्थ १९ औं सत्याग्रहमा भएका सम्झौता यथाशीघ्र कार्यान्वयन गर्न अनुरोध गर्दछु । ’
प्रधानमन्त्रीले गरेको स्वास्थ्यलाभको कामनाप्रति भने उनले धन्यवाद दिएका छन् ।