विराटनगरस्थित नोबेल मेडिकल कलेज एवं शिक्षण अस्पतालमा यसवर्षको एमबीबीएस परीक्षा उतीर्ण गरेका विद्यार्थीले मेडिकल काउन्सिलको इन्टर्नसिपमा सहभागि हुनबाट बन्चित भएको विरोधमा बुधबार तालाबन्दी गरेको आजको अन्नपूर्ण र नागरिकमा खबर छ ।
परीक्षा फारम नेपाल मेडिकल काउन्सिल (एनएमसी) मा समयमै नबुझाउँदा ६१ विद्यार्थी इन्टर्नबाट वन्चित भएका हुन् । एमबिबिएस अध्ययन सकेपछि मेडिकल काउन्सिलबाट ‘लाइसेन्स’ लिन इन्टर्न परीक्षा दिनुपर्छ।
२ हजार ५ सय रुपैयाँ शुल्क तिरेर तीन साताअघि इन्टर्नसिप फारम भरेका नोबेलका ६१ विद्यार्थीको कागजात कलेजले काउन्सिलमा नपठाउँदा परीक्षा दिन नपाएका विद्यार्थीले बुधबार नोबेल मेडिकल कलेज प्रशासन तालाबन्दी गरेका छन्।
प्लेकार्डसहित विरोध प्रदर्शनमै उत्रिएका विद्यार्थीले परीक्षा दिन नपाउँदा मानसिक र आर्थिक तनाव झेल्नुपरेको बताए। उनीहरूले काउन्सिललाई पत्र लेखेर नोबेलले परीक्षा फारम समयमा नपठाउँदा आफूहरूले परीक्षा दिन नपाएको जानकारी गराएका छन्।
‘इन्टर्नसिपको परीक्षा दिन शनिबार काठमाडौं पुग्यौं,’ एक विद्यार्थीले नागरिकसँग भने, ‘परीक्षा दिनेहरूको सूचीमा हाम्रो नाम नै थिएन, के भो भनेर बुझ्दा कलेजले फारम नै नपठाएको पाइयो।’ पीडित विद्यार्थीले भविष्य खेलबाड गरेको भन्दै कलेजसँग क्षतिपूर्ति माग गरेका छन्।
‘नोबेल मेडिकल कलेजमा इन्टर्न परीक्षाका लागि हामीले बुझाएको फारम कलेजले समयमै मेडिकल काउन्सिल पठाएन,’ विद्यार्थीहरूले काउन्सिललाई बुझाएको पत्रमा लेखेका छन्, ‘फारम भर्ने म्याद सकिएपछि मात्र हामीले त्यसबारे जानकारी पायौं।’
विद्यार्थीहरूले पुनः इन्टर्नसिपको मौका दिन काउन्सिलसँग माग गरेका छन्। विद्यार्थीले त्यही माग पूरा गराउन नोबेलमा बुधबार दुई घन्टा धर्ना दिए। उनीहरुले कलेजले ‘फारम लुकाएर अन्याय’ गरेको आरोप लगाउँदै नोबेललाई सजाय गर्न पनि माग गरेका छन्।
– See more at: http://setopati.com/chapa-bata/2998/#sthash.QzHIyVnY.dpuf