पोखरा । पोखराको अभियान युवा क्लवले स्याङजाको अधिखोला गाउँपालिका वडा नं. ५ बाँगेमा अवस्थित दुई आधारभुत विद्यालयलाई शैक्षिक सामाग्री वितरण गरेको छ । उक्त वडाको सिरनचौरमा अवस्थित श्री भगवती आधारभुत विद्यालय र सम्रेसमा अवस्थित श्री बाराही आधारभुत विद्यायलका विद्यार्थीहरुलाई क्लबले शैक्षिक सामाग्री वितरण गरेको हो ।
क्लबले आन्तरिक पर्यटन प्रवद्र्धनसँगै सामाजिक उत्तरदायित्व बहन गर्दै विद्यालयलाई सहयोग गरेको क्लबका अध्यक्ष राजु गिरीले जानकारी दिए । उनका अनुसार भगवती विद्यालयका २७ विद्यार्थी र बाराही विद्यालयका २१ विद्यार्थीहरुलाई कपि, कलम र खाजा स्वरुप नगद वितरण गरिएको हो । साथै दुवै विद्यालयलाई भलिबलसमेत वितरण गरिएको अध्यक्ष गिरीले बताए ।
सोही स्थानको होमस्टेको प्रवद्र्धन र विद्यार्थीलाई हौसला प्रदान गर्न क्लबले सहयोग गरेको अध्यक्ष गिरीको भनाई थियो ।
२०६३ सालमा स्थापना भएको क्लवले सामाजिक, वातावरण, शिक्षा, स्वास्थ्य तथा खेलकुदका कार्यक्रम गर्दै आएको छ ।
