राजु गिरी, पोखरा । आउँदो बैशाख ३० गते स्थानीय चुनावको मिति घोषणा भएसँगै उम्मेदवारका आकांक्षीहरुको चर्चा चल्न थालेको छ । नेपालकै ठुलो महानगरपालिका पोखरा महानगरपालिकाको मेयरमा पनि को आउलान भन्ने विषयमा धेरैको चासोको विषय बनेको छ । कतिले सामाजिक सञ्जालमार्फत नै मेयरको उम्मेदवारमा घोषणा गरिसकेका छन् ।
उम्मेदवार घोषणा गर्नु एउटा पाटो भएपनि पोखरा महानगरका लागि सक्षम व्यक्ति को हुन सक्छन् भन्ने विषयमा समेत छलफल तथा चिया गफ हुन थालेको छ । चुनावको मिति घोषणासँगै पोखराको सामान्य चिया पसल, विभिन्न सभा सम्मेलनमा होस् या राजनीतिज्ञ, व्यवसायी तथा बुद्धिजीबिहरुमा पनि अवको आउने पोखरा महानगरका मेयरको विषयले स्थान लिइरहेको छ ।
यस्तैमा पोखरा महानगरपालिकाका मेयर हुन योग्य व्यक्तिकोरुपमा सफल उद्योगी व्यवसायी संजिब बहादुर कोइरालाको नाम चर्चामा आएको छ । कोइराला हाल नेपाल उद्योग वाणिज्य संघ गण्डकी प्रदेशका अध्यक्ष हुन् । राज्यको मेरुदण्ड अर्थतन्त्र, अर्थतन्त्रको मेरुदण्ड निजी क्षेत्र भएकाले बृहत्तर पोखरा निर्माण र देशकै आर्थिक केन्द्र पोखरा निर्माण गर्न निजी क्षेत्रको नेतृत्व पनि सक्षम भएकाले महानगरको मेयरमा कोइराला योग्य रहेका विज्ञहरुको भनाई छ ।
व्यवसायिक क्षेत्र मात्र नभई पोखराको विकासमा प्रत्यक्ष र अप्रत्यक्षरुपमा योगदान दिँदै आएका कोइराला मेयरका लागि सक्षम व्यक्तिको रुपमा रहेका सामाजिक व्यक्तित्वहरुले समेत बताउँदै आएका छन् ।
निजी क्षेत्रलाई सफलरुपमा हाँकेका व्यक्ति मेयरका लागि सक्षम हुन सक्ने लेखनाथ उद्योग वाणिज्य महासंघका पूर्व अध्यक्ष सुमन मोहन भट्टराई बताउँछन् । उनी भन्छन्– ‘उद्योगी मेयरका लागि पक्कै पनि योग्य हुन्छन् । उद्योगीहरुमा लोभ लालच हुँदैन, जुनसुकै पार्टीको भएपनि सफल उद्यमी मेयरका लागि सक्षम छन् ।’ संजीब बहादुर कोइरालामात्र नभई कुनैपनि सफल उद्योगी मेयरका लागि योग्य हुने उनको भनाई थियो । साथै उद्योगीहरु राजनीतिमा आउनु समग्र विकासको लागि राम्रो भएको भट्टराई बताउँछन् ।
पोखराको मुख्य विकासमा योगदान रहेको संजीब बहादुर कोइरालाजस्ता व्यक्ति पोखरा महानगरको मेयरमा आउनु पोखराको विकासका लागि उपयुक्त रहेको राजनीतिज्ञहरुले समेत बताएका छन् ।
चर्चामा रहेका कोइरालाले विगतमा पोखराको फुटपाथ व्यवस्थापन, ठेला निषेधित क्षेत्र घोषणा, बागलुङ बसपार्कमा रहेको अवैधानिक देहव्यापारलाई रोक्न, जाइका खानेपानीको प्रोजेक्ट, पोखरामा अन्तर्राष्ट्रिय विमानस्थल बनाउनुपर्नेलगाएत पोखराको बृहत्तर विकासका लागि सामाजिक कार्य गर्दै आएका सफल उद्योगी हुन् । नेपाल उद्योग वाणिज्य संघको तीन कार्यकाल सदस्य रहि हाल प्रदेश उद्योग वाणिज्य संघको अध्यक्ष रहेका व्यवसायी संजिब बहादुर कोईरालाले पोखरामा स्वदेशी लगानी भित्र्याउने कार्यमा पनि सक्रिय छन् । सिक्लेस केबलकार निर्माण योजनादेखि पर्यटनको क्षेत्रमा नयाँ लगानी ल्याउन उनको सक्रिय भुमिका रहेको छ ।