राजु गिरी, पोखरा । डायनामिक पब्लिक लाइब्रेरी (डिपिएल) नेपालको दोश्रो राष्ट्रिय महाधिवेशन यहि चैत्र ११ र १२ गते पोखरामा हुने भएको छ । बिहीबार पोखरामा आयोजित पत्रकार सम्मेलनमा महाधिवेशनको सम्पूर्ण तयारी पुरा भएको आयोजकले जानकारी दिएका हो ।
महाधिवेशनमा कास्की जिल्ला बाहिरबाट ३ सय जना र कास्कीबाट ७५ जना प्रतिनिधि सहभागि हुने डिपिएल युथ बोर्ड गण्डकीका अध्यक्ष बसन्त गिरीले जानकारी दिए । नेपालका सबै जिल्लामा संस्था नभएपनि सबै जिल्लामा संस्था गठनको प्रक्रिया भइरहेको उनले बताए ।
पठन संस्कृतिको विकासका लागि संस्था जन्मिएको संस्थाका संस्थापक अध्यक्ष भेषराज न्यौपानेले बताए । विशेषगरि युवालाई प्रोत्साहन गरिएको र समाज रुपान्तरणका लागि संस्था अगाडी बढीरहेको उनको भनाई थियो ।
त्यस्तै महाधिवेशन मुल व्यवस्थापन समितिका संयोजक राजकुमार भण्डारीले तयारी महाधिवेशनको तयारी पुरा भएको र पाल्नुहुने प्रतिनिधि तथा पाहनुालाई स्वागत गर्न आतुर रहेको बताए । साथै उनले महाधिवेशनलाई भव्यरुपमा सफल बनाउन सबैलाई आग्रह समेत गरे ।
महाधिवेशनको उद्घाटन गण्डकी प्रदेशका मुख्यमन्त्री कृष्णचन्द्र नेपालीले गर्ने कार्यक्रम रहेको आयोजकले जनाएको छ ।
डिपिएल नेपाल पूर्वी नेपाल झापाको दमक नगरपालिकामा ९ वर्ष अघि स्थापना भएको संस्था हो । डिपिएलले उद्यमशिलता, बहस, कला, साहित्य, लेखनशिप, वक्तित्वकला, नेतृत्व विकास, शिप विकासजस्ता कार्यक्रमबाट युवा वर्गलाई लाभ दिइरहेको छ ।