· यो स्वेत आतंक हो
· मिसन होइन कमिसनको खेल हो
माघ १८,पोखरा/पोखरा उपमहानगरपालिकाले गत महिनादेखि पोखरामा उठाउन लागेको फरक प्रकृतीको फोहोर कर नागढुङ्गाबासीले नतिर्ने भएका छन् । नागढुङ्गा, वडा नम्वर ८ र ९ का बासिन्दाहरुको संयुक्त टोलभेलाले यस्तो निर्णय गरेको हो । नागढुङ्गा युवा क्लवको पहलमा शनिवार आयोजित टोलभेलामा बोल्ने टोलका अगवुाहरुले नगरपालिकाले लिंदै आएको साविक बमोजिमको कर तिर्ने तर नयाँ मुल्य अनुसारको कर कुनै हालतमा नतिर्ने बताए ।
‘हामीलाई सोध्दै नसोधि जवर्जस्त लादिएको फोहोर कर तिर्दैनौं बरु प्रतिकार गर्न तयार छौं’– नागढुङ्गा आमा समुहका अध्यक्ष पवित्रा गिरीले भेलामा भनिन् । त्यस्तै एयरपोर्ट टोल विकास संस्थाका उपाध्यक्ष गणेशकुमारी शर्माले घरमुलिले फोहोर कर तिरिसकेपछि घरका सम्पूर्ण सदस्यहरुले तिर्नुपर्ने यो कस्तो नियम ? भन्दै प्रश्न गरिन ।
पोखरा उद्योग बाणिज्य संघका सदस्य समेत रहेका नागढुङ्गाका स्थानिय धनिराम बरालले यसलाई नगरपालिकाको स्वेत आतंकको संज्ञा दिंदै नगरपालिकाले सिधै नगरबासिको आँखामा कालो पट्टि बाँधेर ठग्न थालेको बताए । अर्का स्थानिय लिलबहादुर घलेले राज्यले भने अनुसार जनताले तिर्दै आएपनि त्यसवापत राज्यले जनतालाई कुनै सुविधा दिन नसकेको जिकिर गरे । ‘उनीहरु कुर्सिमा बसेर शासन गर्ने अनि हामी शासित हुने, के हामी तिनका दास हौं’– उनले प्रश्न गरे । त्यसैगरि भेलमा स्थानिय रुद्रबहादुर घले, कमला श्रेष्ठ, राजेन्द्र श्रेष्ठ, लगायतले नगरपालिकाले यसलाई मिसन भने पनि यो कुनै मिसन नभई कमिसन भएको आरोप लगाए ।
स्थायिन कमल काफ्लेले फोहोर कर उठाउन फोहोरका ठेकेदारहरु आउन थालेको बताए । ‘चिल्लो गाडिबाट झरेका ठेकेदारले पैसा नतिरे कुटेर पनि असुल्छु भनि थर्कायो’–उनले भने । पोखरा उममहानगरपालिकाले गएको पौष महिनादेखि प्रत्येक घरमा सटर बमोजिम नयाँ मुल्य अनुसारको कार्ड वितरण गर्न थालेको छ । एकै घरका फरक फरक सटरमा पनि सटरैपिच्छे फोहोर कर असुल्न थालेपछि टोलबासिहरु यसको विरुद्धमा लागेका हुन् । नगरपालिकाले एकै घरको सटरमा सय रुपैयाँदेखि तीन शय, पाँच शय, आठ सय, एक हजार लगाएत फरक फरक रकम उठाउन शुरु गरेको छ ।