दिपक के श्रेष्ठ
नेपाली कांग्रेसको अगुवाइमा विपक्षी दलहरुले मुख्यमन्त्री गुरुङविरुद्ध अविश्वासको प्रस्ताव दर्ता गराउँदै विशेष अधिवेशनको माग गरेपछि गण्डकी प्रदेशको राजधानी तरंगित भएको छ ।
विपक्षी दलका सांसदहरु कुन मन्त्रालयमा को जाने ? भनेर हिसाबकिताब गरिरहेकाबेला मुख्यमन्त्री गुरुङ भने ‘कुल’ देखिएका छन् । बिहीबार साँझ सञ्चारकर्मीसँग कुरा गर्दै गुरुङले यसलाई राजनीतिक प्रक्रिया भएको बताए ।
परिस्थिति आफु विपरित अझै भइनसकेको बताउँदै गुरुङ अब केही छिनपछि काठमाण्डौं जाँदैछन् । पारिवारिक भेटघाट भनिएपनि आगामी ६ गते हुने पार्टीको भेला र प्रदेशमा आफ्नो पक्षमा माहौल बनाउन मुख्यमन्त्री राजधानी जान लागेका हुन् ।
मुख्यमन्त्रीका प्रेस सल्लाहकार विक्रम न्यौपानेले राजधानी यात्रालाई ‘महत्वपुर्ण’ भनेका छन् । त्यसो त मुख्यमन्त्री गुरुङ जसपाका हरिशरण आचार्य र बाबुराम भट्टराईसँग निरन्तर संवादमा छन् भने राजमोका चित्रबहादुर केसीसँग काठमाण्डौंमा भेट्ने योजनामा छन् ।
संचारकर्मीसँग कुरा गर्दै मुख्यमन्त्री गुरुङले केन्द्रमा सरकारको समर्थन फिर्ता नलिएको प्रसंग निकाल्दै गण्डकीमा देखिएको गुटबन्दीलाई प्रतिगामी कदम भनि टिप्पणी गरेका छन् । ‘वामपन्थीको सरकार ढालेर गैरवामपन्थी सरकार ल्याउन खोज्ने यो कदम प्रतिगामी हो’ गुरुङले भने ।
माओवादीले मुख्यमन्त्री पाउने होइन, मन्त्री मैले दिएकै थिए भन्दै उनले चित्रबहादुर केसीलाई सरकारमा पनि नजाने ढाल्नमात्रै सघाउनु पर्ने कस्तो आपत आइलाग्यो ? भन्दै प्रश्नसमेत गरे । यही विषयमा घनीभुत छलफल गर्न अधिवेशन रोकेको मुख्यमन्त्रीले स्पष्ट पारे ।
काम गरिरहेको सरकारको विकल्प खोज्नु आश्चर्यजनक भएको उनले बताए । विपक्षीको यस्तो कदमले संघीयता र स्थिरतालाई सहयोग नगर्ने भन्दै उनले ‘भ्रष्टाचार गरेर हटाउन खोजेको हो कि ?, संघीयताविरोधी काम गरेर हटाउन खोजेको हो ?’ भन्ने प्रश्न गरेका छन् ।
‘काठमाण्डौमा रिसाएको बिरालोले पोखरामा खाबो चिथ¥यो’ गुरुङले भने, ‘केपी ओलीको रिस यता पोख्दैछन् ।’ प्रदेश प्रमुखसमेत हटाउने चर्चा चलेको विषयमा उनले भने ‘प्रदेश प्रमुख हटाएर लोकतन्त्र र संघीयता बलियो हुने हो र ?’
विपक्षीले विशेष अधिवेशनको माग गरिरहँदा राजधानी यात्रामा निस्कन लागेकोबारे जिज्ञासा राख्दा मुख्यमन्त्री गुरुङले भने ‘यो संवैधानिक प्रक्रिया हो, अधिवेशन बोलाउने/नबोलाउने काम सभामुखको हो ।’