काठमाडौं । सञ्चार तथा सूचना प्रविधिमन्त्री पार्वत गुरुङले सञ्चारकर्मीले देशलाई सही बाटोमा डोर्याउन महत्वपूर्ण भूमिका निर्वाह गर्नुपर्ने बताएका छन् । चलचित्र पत्रकार संघ नेपालको २१ औं साधारणसभाको आज राजधानीमा उद्घाटन गर्दै उनले समाजको अग्रगामी परिवर्तनका लागि कलम चलाउन सञ्चारकर्मीलाई आग्रह गरे ।
मन्त्री गुरुङले सञ्चारकर्मीले नकारात्मक समाचार मात्र नलेखेर सकारात्मक सन्देश दिने समाचारमा ध्यान दिनुपर्नेमा जोड दिदैं समाजमा सकारात्मक सोचको विकास गराउन सञ्चारकर्मीले प्रभावकारी भूमिका निर्वाह गर्नुपर्ने बताएका छन् । हरेक क्षेत्रमा शिर उँचो बनाउने उद्देश्यका साथ काम गर्नुपर्नेमा जोड दिँदै उनले सञ्चार क्षेत्रमा समेत यसको आवश्यकता भएको उल्लेख गरे ।
मन्त्री गुरुङले समाजलाई समृद्ध बनाउने ढंगले काम गर्नुपर्ने सुझाव दिँदै आफ्नो संगठनको हित हुने गरी काम गर्न सबैमा आग्रह गरेका छन् । उनले संगठन तथा पार्टीमा रहँदासम्म जिन्दावाद भन्ने र छाड्दा मुर्दावाद भन्ने संस्कारको अन्त्य गर्नुपर्नेमा जोड दिएका छन् । मन्त्री गुरुङले संस्था स्थापना गर्नु मात्र ठूलो कुरा नभइ त्यसलाई जोगाइराख्नु अति आवश्यक भएको उल्लेख गर्दै सञ्चार क्षेत्रको दायरा फराकिलो बन्दै गएकोमा खुसी व्यक्त गरेका छन् । उनले चलचित्र उद्योगको विकासका लागि चलचित्र विकास बोर्डसँग मिलेर काम गर्न सुझाव दिएका छन् ।
सो अवसरमा मन्त्री गुरुङले नेपाल चलचित्र पत्रकार संघले अघि बढाएको कल्याणकारी कोष अभियानको शुभारम्भ गरे । संघले २० लाख बराबरको अक्षय कोष खडा गर्ने अभियान सुरु गरेको छ ।
कार्यक्रममा मन्त्री गुरुङले चलचित्र पत्रकार संघ नेपालका संस्थापक अध्यक्ष तथा पूर्वअध्यक्षलाई सम्मानपत्रद्वारा सम्मान गरे । सम्मानित हुनेमा पुर्वअध्यक्षद्वय विदुर गिरी र शान्ति प्रिय, निवर्तमान अध्यक्ष सन्दीप सापकोटा रहेका छन् ।
कार्यक्रममा नेपाल पत्रकार महासंघका सचिव प्रकाश थापा, चलचित्र विकास बोर्डका अध्यक्ष दयाराम दाहाल, सदस्य सचिव महेन्द्रप्रसाद शाही, नेपाल प्रेस युनियनका महासचिव अजयबाबु शिवाकोटी, नेपाल चलचित्र कलाकार संघका अध्यक्ष रवीन्द्र खड्का, नायक भुवन केसी, निर्माता तथा कलाकार दिपाश्री निरौलालगायतले साधारणसभाको सफलताको कामना गरेका थिए । रासस