युरोप । नेपाल पत्रकार महासंघ युरोप शाखाको आसन्न निर्वाचनका लागि अध्यक्ष पदमा पत्रकार महेशकुमार खातीले उम्मेदवारी घोषणा गरेका छन् । आफू अध्यक्षमा उठ्न लागेको घोषणा आफ्नो फेसबुकमार्फत् सार्वजनिक गरेका हुन् । ‘पत्रकारिता आफैंमा परिवर्तनको संवाहक हो र पत्रकारिताले परिवर्तनको आवाज उठाउँछ । अबको नयाँ कार्यसमितिमा म अध्यक्षमा उठ्छु ।’ खातीले लेखेका छन् ।
हाल महासघको सचिव समेत रहेका खातिले युरोपमा नेपाली पत्रकारिताको श्रीवृद्धि गर्न आफू लागिपर्ने प्रतिवद्धता समेत व्यक्त गरेका छन् । सबै अग्रज र समकालीन साथी मिलेर अघि बढ्न र युरोपमा कार्यरत पत्रकारलाई गोलबन्द बनाई संस्थागत हितलाई प्रबन्धन गरि अगाडि बढाउन प्रयत्न गर्ने जनाएका छन् । निर्वाचनका लागि नेपाल पत्रकार महासंघ केन्द्रीय समित केन्द्रीय प्रतिनिधि चिरन शर्मा, निर्वाचन समितिका संयोजक राजेश चाम्लिङ राई र सदस्य, प्रर्यवेक्षक नरेश खपांगी मगरलाइ जिम्मेवारी दिइएको छ ।
खातीको फेसबुकमा उम्मेदवारी निम्न अनुसार रहेको छ ।
नेपाल पत्रकार महासंघ, युरोप शाखा अध्यक्षमा उम्मेदवारी घोषणा
असली अर्थात् स्वच्छ, निष्पक्ष र पारदर्शी पत्रकारिता सधैं विधि, पद्धति र लोकतन्त्रको पक्षधर हुन्छ । आवधिक निर्वाचनमा स्वच्छ प्रतिस्पर्धाबाट नेतृत्व परिवर्तन लोकतन्त्रको सौन्दर्य हो ।
लोकतन्त्रका तिनै मूल्य मान्यतालाई शिरोपर गर्दै निकट भविष्यमा हुँदै गरेको नेपाल पत्रकार महासंघ युरोप शाखाको अध्यक्षमा आफ्नो उम्मेदवारी घोषणा गर्ने निर्णय गरेको छु । पत्रकारिता आफैंमा परिवर्तनको संवाहक हो र पत्रकारिताले परिवर्तनको आवाज उठाउँछ । हामी परदेशमा रहेका पत्रकार जसले यहाँको प्रविधि, कला, विकास, मानवीय मूल्य, संस्कार र सुसंस्कृत समाज देखेका र भोगेका छौं । लेखेर र संचार माध्यम मार्फत अरुलाई जे भन्छौं सुरुआत पनि हामीबाटै हुनुपर्छ भन्ने मान्यता राख्छु ।
यसपालिको अधिवेशनबाट सम्पूर्ण सहकर्मी पत्रकार अग्रज र शुभ चिन्तकबाट परिवर्तनका पक्षको मेरो उम्मेदवारीलाई साथ दिनुहुनेछ भन्ने विश्वास गरेको छु । संधै सही मार्ग देखाउने पत्रकारितामा आवद्ध हामी सबै पत्रकारहरु फ्रन्टलाइनमा हुन्छौं । केही समयदेखि युरोप शाखामा विवाद, जटिल अवस्था र विभिन्न शिरामा बाँडिएका छौं । विधि र पद्धति अनुसार अब सबै मिलेर जानुको विकल्प छैन ।
यसैमार्फत् आह्वान गर्दैछु, सबै अग्रज र समकालीन साथीहरु सबै मिलेर अघि बढौं । युरोपमा कार्यरत पत्रकारलाई गोलबन्द बनाई संस्थागत हितलाई प्रबन्धन गरि अगाडी बढाउन प्रयत्न गर्नेछु । पत्रकार र पत्रकारिताको मुल मर्म पेशागत हित नै प्रमुख हो । हाम्रा आ–आफ्ना राजनीतिक तथा अन्य आस्था र विचार होलान् । तिनलाई परै राखेर सबै एक भएर संस्थागत र साझा हितमा लाग्नुपर्ने आवश्यकता छ ।
युरोपमा रहेका सबै पत्रकार र पत्रकारिताको क्षमता अभिवृद्धिका लागि बदलिँदो प्रविधि सुहाउँदो नियमित तालिम तथा क्षमता अभिवृद्धि पहिलो प्राथमिकता हुनेछ । अहिले सबैको आँखा युरोप शाखामा केन्द्रित छ ।
सन् २०१२ का संस्थापकदेखि हालसम्मका अध्यक्ष र कार्यसमितिको योगदानले यो अवस्थामा महासंघ छ । अब सबैको साथ र सहयोगबाट विधिसम्मत सही तवरले अवतरण गराउन सकारात्मक भूमिका निभाउनु हुनेछ भन्ने पूर्ण विश्वास छ ।
युरोपमा नेपाली पत्रकारिता फस्टाउँदै गइरहेको छ । अझै व्यवस्थित र व्यवसायिक बनाउनु आवश्यक छ । यसमा सबैको साथ र सहयोग हुनेमा पूर्ण विश्वास छ । महासंघ युरोप शाखा र अग्रजहरुबाट सुरु भएका प्रभावकारी कार्यहरुलाई निरन्तरता दिन प्रतिबद्ध छु ।
पत्रकार अग्रजको सम्मान, समकालिनलाई प्रोत्साहन र युरोपको नेपाली समाजको हितका लागि समय सुहाउँदा कार्य गर्न गराऊन मबाट हुन सक्ने प्रयत्न गर्नेछु । मर्यादित, निष्पक्ष र स्वतन्त्रता पत्रकारिताको मूल मन्त्र हो । यसलाई आत्मसात गरेर पेसागत र व्यवसायिक बनाउनुपर्छ ।
युरोपमा रहेका नेपाली राजदूतावास, कूटनीतिक निकाय, क्रियाशील सामाजिक तथा राजनीतिक संघसंस्था गैरआवासीय नेपाली संघ, खेलकुद, संस्कृति, साहित्य, वाणिज्य तथा पर्यटनसंग सम्बंधित संघसंस्थाहरु लगायत नेपाल र नेपालीको हकहितको पक्षमा सहकार्य तथा समन्वय गरेर अघि बढ्नेमा दृढ छु ।
शासन व्यक्तिको हैन विधिको हुनुपर्छ भनेजस्तै छिट्टै हुन गइरहेको नेपाल पत्रकार महासंघ, युरोप शाखाको निर्वाचन विधानअनुसार लोकतान्त्रिक पद्धतिमार्फत् सफल पार्न सबै साधारण सदस्य, नेपाल पत्रकार महासंघ केन्द्रीय समिति, अग्रज पत्रकार, केन्द्रीय प्रतिनिधि चिरन शर्मा, निर्वाचन समितिका संयोजक राजेश चाम्लिङ राई र सदस्यहरु, र्प्रवेक्षक नरेश खपांगी मगर र सम्पूर्ण सबैमा हार्दिक विनम्र अनुरोध गर्दछु ।
हार्दिक धन्यवाद सहित नमस्कार !
विनीत,
महेशकुमार खाती । हाल डेनमार्क ।
सचिव–नेपाल पत्रकार महासंघ, युरोप शाखा (२०१७–२०२१)