गन्थन डेस्क
दुर्लभ रोगबाट ग्रसित भएर जीवन बिताइरहेका व्यक्तिहरुको दिनचर्या समेटिएको शीर्षकमा आयोजित विश्वव्यापी फोटो प्रतियोगितामा पोखराका फोटोग्राफर खिमकाजी लामिछाने उत्कृष्ट पाँचमा पर्दै फाइनलमा पुग्न सफल भएका छन् ।
अमेरिकाका वरिष्ठ फोटो पत्रकार मार्कस ब्लिडेलद्वारा आयोजित प्रतियोगिता ‘युरोर्डिस फोटो अवार्ड’मा लामिछानेले ओस्टिओजेनेसिस इमपर्फेक्टा (ओआई)बाट पीडित बच्चालाई विद्यालय जान ह्विलचेयरमा सघाइरहेकी महिलाको तस्बिर सहभागी गराएका छन् । तस्बिरमा देखाइएको बालक र महिला लामिछानेकै छोरा र श्रीमती हुन् ।
तस्बिरमा ‘ओ आई’ क्याप्सन लेखिएको छ । ओआई सजिलै हाँड भाँच्चिने रोग हो । ओ आइबाट ग्रसित भई हिड्न नसकेपनि पढ्ने इच्छालाई रोक्न नसक्ने सन्देश तस्बिरले दिन खोजेको फोटोग्राफर लामिछानेले गन्थनलाई बताए । ‘खुट्टा भाँच्चिएपनि पढ्ने इच्छा र उत्साह भाँच्चिदैन’ लामिछानेले भने ‘मेरो फोटोको यही सन्देश हो ।’ उनले विश्वव्यापी अवार्डको फाइनल चरणमा पुग्नु आफैमा गर्विलो क्षण रहेको जनाएका छन् ।
प्रतियोगिताको फाइनल ‘रेयर डिजिज डे’ अर्थात् २४ फेब्रुअरीमा हुने बताउँदै उनले सामाजिक सञ्जालमा प्राप्त भोटलाई आधार मानेर विजेता चयन गरिने जानकारी दिए । लामिछानेले आफु नेपालबाट प्रतिनिधित्व गरेको भन्दै सम्पूर्णमा भोट गरिदिन अपील समेत गरेका छन् ।
युरोपियन अर्गनाइजेसन फर रेयर डिजिज (युरोर्डिस)को आयोजनामा भएको फाइनल प्रतिष्पर्धाका अन्य सहभागीमा आइसल्याण्ड, अमेरिका, स्लोभाकिया र अष्ट्रियाका फोटोग्राफर एवं फोटो पत्रकार रहेका छन् ।
– फोटोग्राफर लामिछानेलाई भोट गर्न याे लिंकमा जानुहोस् ।
OI Can
Disease: Osteogenesis Imperfecta
Caption: My son Animesh, Osteogenesis Imperfecta, got a fracture in his femur and my wife took him to school in a stroller.
Photographer: Khim Bahadur Lamichhane
Country: Nepal