पोखरा । मर्मत गर्नका लागि शुक्रबारदेखि खोलिएको फेवाताल बाँधबाट सोमबारसम्म १ मिटर पानी बगेर गएको छ ।
जलस्रोत तथा सिँचाई विकास डिभिजन कार्यालय कास्कीले सोमबारसम्म तालबाट १ मिटर पानी बगेर गएको जानकारी दिएका हो । सिँचाई कार्यालय कास्कीका प्रमुख किरण आचार्यका अनुसार फेवातालमा १ मिटर पानीको मात्रा घटाउँदा ५ करोड ८० लाख लिटर पानी बगेको छ ।
कार्यालयले फेवातालमा पानीको सतह २ मिटरसम्म घटाउने बताएको थियो । तर यतिबेला फेवाताल घुम्न आउने पर्यटक र सर्वसाधारणले तालको दृश्य देखेर केही दुखेसो व्यक्त गरेका कारण पानीको सतह आवश्यकभन्दा थोरै घटाएर काम भइरहेको छ ।
बाँध मर्मत गर्न करिब १ महिना समयवधि लाग्ने आचार्यले जानकारी दिएका छन् । मर्मत समयवधिभर फेवातालमा पानी सतह अहिलेको जस्तै रहने छ । यसअघि डिभिजन कार्यालयले गतवर्ष तालको बाँधबारे अध्ययन गरेर बाँध मर्मत गर्नुपर्ने निष्कर्ष निकालेको थियो । जसका आधारमा गण्डकी प्रदेश सरकारले बाँध मर्मत र नहर मर्मत गर्न २ करोड बजेट छुट्याएको थियो ।
तस्विर: रिना थापा