पोखरा । विश्वव्यापी महामारिका रुपमा फैलिएको कोभिड–१९ सङ्क्रमणबाट गण्डकी प्रदेशअन्तर्गत कास्की सबैभन्दा बढी प्रभावित भएको छ । प्रदेशका अन्य १० जिल्लाको तुलनामा कास्कीको मृत्युदर, सङ्क्रमण र सक्रिय सङ्क्रमितको सङ्ख्या बढिरहेको स्वास्थ्य निर्देशनालय गण्डकी प्रदेशको तथ्याङ्कमा उल्लेख छ ।
कोरोनाका कारण गण्डकी प्रदेशमा कूल १ सय ८६ ले ज्यान गुमाएकामा कास्की जिल्लामा मात्र १ सय ५ को मृत्यु भएको छ । अन्य आठ जिल्लामा मृत्युको सङ्ख्या ८१ मात्र रहेको छ । गण्डकी प्रदेशको हिमाल पारिका जिल्लाका रुपमा परिचित मनाङ र मुस्ताङमा अहिलेसम्म कोरोना भाइरस सङ्क्रमणका कारण मृत्यु भएको छैन भने तनहुँ २०, नवपरासी पूर्व २०, स्याङ्जामा १३, गोरखामा ९ जना , बाग्लुङ ८, लमजुङ पाँच, पर्वत र म्याग्दीमा तीन÷तीन जनाको मृत्यु भएको तथ्याङ्क छ ।
स्वास्थ्य निर्देशनालय पोखराका वरिष्ठ स्वास्थ्य शिक्षा प्रशिक्षक नवराज शर्माका अनुसार यो प्रदेशमा सक्रिय सङ्क्रमित सङ्ख्या कूल एक हजार ६१२ मध्ये कास्कीको पोखरामा मात्र ६ सय ५६ रहेका छन् । कूल १३ हजार ५ सय ६३ सङ्क्रमितमध्ये कास्कीका मात्र ६ हजार १ सय २१ जना रहेको निर्देशनालयले जनाएको छ ।
गण्डकी प्रदेशमा हालसम्म एक लाख १५ हजार ६०४ जनाको पिसिआर परीक्षण गरिएकामा १३ हजार ५८३ जनामा कोरोना भाइरस पोजेटिभ देखिएको थियो । एक लाख दुई हजार २१ जनामा नेगेटिभ देखिएको थियो भने एक हजार ६३२ जना अहिले पनि सक्रिय सङ्क्रमित छन् । निर्देशनालयको तथ्याङ्कअनुसार हालसम्म प्रदेशमा निको हुने दर ८६।६२ प्रतिशत, सक्रिय सङ्क्रमित दर १२।०२ प्रतिशत र मृत्यु हुने दर १।३७ प्रतिशत रहेको छ ।
गण्डकी प्रदेशमा कोभिड–१९ को नियन्त्रण र उपचारमा तोकिएका मुख्य अस्पतालमा पोखरा स्वास्थ्य विज्ञान प्रतिष्ठान, मणिपाल शिक्षण अस्पताल, सङ्क्रामक तथा सरुवा रोग अस्पताल, गण्डकी मेडिकल कजेल, चरक मेमोरियल, फिस्टेल अस्पताल रहेका छन् । अन्य अस्पतालमा फेवा सिटी, लेकसिटी, पार्कल्याण्ड, पश्चिमाञ्चल सामुदायिक, मेडिप्लस, नमस्ते, ग्यालेक्सी, मेट्रोसिटी, कास्की सेवा, गोरखा र पर्वत जिल्ला अस्पताल, धौलागिरि, मध्यविन्दुलगायतका विभिन्न १९ वटा अस्पतालमा कूल २२३ आइसियु र ६२ भेन्टिलेटर श्ययाको व्यवस्था गरिएको छ ।
गण्डकी प्रदेशको राजधानी पोखरामा अवसरका लागि सबै क्षेत्रका मानिस आउने र जनसङ्ख्यासमेत अध्याधिक भएका कारण सङ्क्रमण अभैm पनि कम भएको छैन । पछिल्लो समय पिसिआर परीक्षण भने घटेको छ । प्रदेश सरकारले सरकारी अस्पतालमा सम्पूर्ण उपचार निःशुल्क गर्दै आएको भए पनि कतिपय सङ्क्रमितको परिवारले उपचारका लागि सरकारी अस्पतालमा भन्दा बिरामीलाई निजी अस्पतालमा लैजाँदा महङ्गो महसुस गर्नुका साथै धेरैतिर डुलाउँदा ज्यानसमेत गुमाउन पुगेका थिए ।
कोभिड– १९ को सङ्क्रमण रोगथाम, नियन्त्रण र व्यवस्थापनका लागि गण्डकी प्रदेशका मुख्यमन्त्री पृथ्वीसुब्बा गुरुङको अध्यक्षतामा गठित उच्चस्तरीय निर्देशन समितिले योजनाबद्धरुपमा काम गर्दै आएको छ ।
रासस