पोखरा, ७ जेठ /शनिबार दिऊसो देखि रोकिएको पोखरा लेखनाथ महानगर पालिकाको मतगणना अझै सुरु हुन सकेको छैन । फर्जी मतको आरोप लगाउँदै पार्टीका एजेण्टहरु बाहिरिएपछि शनिबार दिऊसो ४ बजेदेखि पोखरामा मतगणना हुन सकेको छैन । मतगणना सुरु गर्नका लागि पटक पटक बसेको सर्बपक्षिय बैठक समेत निष्कर्ष विहिन भयो ।
शनिबार राती नै पहिलो बैठक बसेको थियो । तर निर्वाचन आयोगका प्रतिनिधीले सही रुपमा सहजीकरण गर्न नसकेपछि बैठकबाट कुनै टुंगो लाग्न सकेन र आईतबार बिहानका लागि बैठक स्थगीत भयो । तर आईतबार बसेको बैठक पनि बिना निष्कर्ष टुंगियो छ । बैठक पछि कास्की काँग्रेसका सभापति कृष्ण केसीले १७ नम्बर वडाको विवाद समाधान नभएसम्म कुनैपनि वडाको मतगणना गर्न नदिने बताए । ‘विवाद सिर्जना गर्नु हाम्रो रहर हैन, उनले भने–समस्या आईसकेपछि समाधानका लागि आयोग जिम्मेवार हुनुपर्छ ।’
नेकपा माओबादी केन्द्रका कास्की अध्यक्ष दिपक कोइरालाले विवाद समाधानका लागि आयोग जिम्मेवार नभएको आरोप लगाए । उनले केन्द्रिय आयोगको निर्देशन पछि मात्रै बैठकमा छलफल गर्ने बताए । १४ सय भन्दा बढी मतगणना भएपछि एमालेको सूर्य चिन्हमा फर्जी छाप लगाएको मतपत्र भेटिएको अन्य दलका एजेण्टहरुले बताएका छन् । फरक रंग र साविकको भन्दा ठूलो आकारको छाप लगाएको ८ भन्दा बढी मतपत्र भेटिएको र एउटा मतपत्रमा दुई वटा हस्ताक्ष भएको भेटिए पछि मतगणना स्थगित भएको थियो ।
फर्जी छाप लगाएको मतपत्र भेटिएको भन्दै एमाले वाहेकका दलले विरोध जनाएका छन् । एमालेले यसबारे केहि प्रतिक्रिया दिएको छैन । निर्वाचन आयोगले पनि यसबारे बोल्न चाहेको छैन । प्रयोग गरिएको भन्दा चाक्लो स्वस्तिक छाप देखिएको सहायक निर्वाचन अधिकृत खुमप्रसाद भण्डारीले बताए । ‘२०७० सालमा प्रयोग गरिएको जस्तो छाप देखिएको छ । अहिलेको छाप यस्तो छैन, उनले भने–आयोगले केही ठाउँमा पहिले कै छाप पठाएको भन्ने पनि सुनिएको हो । हामी बुझ्दै छौं ।’