१७ पुस पोखरा । आज अंग्रेजी नया बर्ष सन् २०१४ को पहिलो दिन । बितेको बर्ष सन् २०१३ मा भएका कामको समिक्षा सहित नया बर्षको स्वागत गरिदैछ । एक आपसमा शुभकामना साटासाट गरी नयाँ बर्ष मनाईदैछ । पछिल्लो समय नेपाली नयाँ बर्ष भन्दा पनि अंग्रेजी नया बर्ष मनाउने प्रचलनले नेपालमा ब्यापकता पाएको छ ।
नयाँ बर्ष पोखरामा भब्य स्वागत गरिएको छ । नया बर्ष मनाउन आएका आन्तरिक तथा बाह्य पर्यटकले भरिभराउ पोखराको लेकसाईडमा गएराति आतसवाजी सहित बिशेष कार्यक्रम गरी सन् २०१३ लाई बिदाई गरिएको छ ।
प्रत्येक अंग्रजी नया बर्षको अबसरमा रेष्टुरेण्ट एण्ड बार एसोसिएसन रेवान पोखराले बिगत १४ बर्षदेखि आयोजना गर्दै आएको सडक महोत्सबको १५ औं संस्करण अन्तर्गत हिजो साझ मात्रै झण्डै २ लाख दर्शक लेकसाईडमा भेला भएका थिए । हिजो दिउसै देखि भरिएको लेकसाईडका सडक साझ परेपछि मानिसको भिडले खचाखच थियो ।
अघिपछि राति ११ बजेसम्म चल्ने महोत्सब हिजो राति १ बजेसम्म चलेको थियो । मध्यरात १२ बजे नयाँबर्षको स्वागतको लागि गरिएको आतसबाजीको दृष्य हेर्न पुग्नेको भिडले लेकसाईड तातेको थियो ।
महोत्सब स्थल लेकसाईडको साढे ३ किलोमिटर क्षेत्र र बसुन्धरा पार्कमा दर्शकको चाप थामिनसक्नु भएपछि ब्यबस्थापनको लागि आयोजकलाई हम्मे परेको थियो । बसुन्धरा पार्कमा आयोजित सास्कृति कार्यक्रम हेर्न जानेहरु कतिपय अत्याधिक भिडको कारण बाहिरबाटै फर्किन बाध्य भएका थिए ।
सडक महोत्सबले बर्षेनी नया बर्ष मनाउन पोखरा आउने पर्यटकको संख्या बढ्दै गएको छ । पोखराको होटल पर्यटकले भरिएका छन् । हिजो महोत्सबकै अत्याधिक दर्शक भित्रिएको र सबैभन्दा बढी कारोबार भएको ब्यबशायीले बताएका छन् । महोत्सबको लागि लेकसाईडको फिस्टेल गेटदेखि खहरेसम्म सडकमै खाने र रमाउने ब्यबस्था मिलाईएको छ । रेवान पोखराको आयोजनामा पुष १३ देखि जारी महोत्सब आज सकिदैछ । तस्विर : राधिका कडेल
