पोखरा । नेपाली काँग्रेसका पूर्व सभापति एवम् पूर्व प्रधानमन्त्री सुशील कोइरालाको जन्मजयन्तीका अवसरमा बुधबार पोखरामा आयोजित कार्यक्रममा उनको योगदानको स्मरण गरिएको छ । नेपाल प्रेस युनयन कास्कीको संयोजनमा जिपी कोइराला फाउन्डेसन क्षेत्र नं २ द्वारा सञ्चारकर्मीका लागि गरिएको ज्याकेट वितरण कार्यक्रममा वक्ताहरूले राष्ट्र, राष्ट्रियता एवम् सार्वभौमिकताका पक्षमा कोइरालाले गरेको योगदान चिरकालसम्म जीवन्त रहने बताएका थिए ।
कार्यक्रममा संविधानसभा सदस्य एवम् जिपी कोइराला फाउन्डेसन गण्डकी प्रदेशका संयोजक शारदा पौडेलले सुशील कोइरालाले नेपाली राजनीतिमा देखाएको त्याग तथा समर्पण सबैका लागि अनुकरणीय भएको बताइन् ।
समाजमा सूचनाको संवाहक सञ्चारकर्मीको पेसागत हकहितका स्थापनाका लागि फाउन्डेसन सधैं तयार रहेको बताउँदै उनले समाचार संकलनमा निस्कँदा सहज होस् भन्ने उद्देश्यले यसअघि पनि फाउन्डेसनका तर्फबाट स्वास्थ्य सामाग्रीसहित ज्याकेट वितरण गरिएको बताएकी छिन् ।
कार्यक्रममा जिपी कोइराला फाउन्डेसन क्षेत्र नं २ का अध्यक्ष बसन्त चालिसेले समाजमा सञ्चार क्षेत्रको महत्वपूर्ण भूमिका हुने बताए ।
नेपाल प्रेस युनियन कास्कीका अध्यक्ष एवं नेपाली काँग्रेस कास्कीका प्रवक्ता नविन सिग्देल, नेपाल पत्रकार महासंघ कास्कीका उपाध्यक्ष बिमला भण्डारी, विजयराज आचार्यलगायतले स्व.कोइरालाको योगदानबारे चर्चा गरेका थिए । सो अवसरमा विभिन्न सञ्चारमाध्यममा कार्यरत सञ्चारकर्मीलाई फाउन्डेसनका गण्डकी प्रदेश संयोजक पौडेल, क्षेत्र नं २ का अध्यक्ष बसन्तराज चालिसे र प्रेस युनयन कास्कीका अध्यक्ष सिग्देलले ज्याकेट हस्तान्तरण गरेका थिए । रासस