काठमाडौं, पुस १५
यसै सिजनको सुरुमा रियल मड्रिड छाडेर इटालियन क्लब युभेन्टसमा अनुबन्ध भएका पोर्चुगिज सुपरस्टार क्रिस्टियानो रोनाल्डो वर्ष २०१८ को दोस्रो सर्वाधिक गोलकर्ता बने ।
वर्ष २०१८ भरिमा उनले पूर्वक्लब रियल मड्रिड, युभेन्टस र पोर्चुगलका लागि गरेर कूल ४९ गोल गरे । जारी सिजन उनी युभेन्टसका लागि सर्वाधिक गोलकर्ता हुन् । उनले सबैखाले प्रतियोगिता गरेर नयाँ क्लबका लागि कूल १५ गोल गरेका छन् । उनले सिरी ‘ए’ मा १४ र च्याम्पियन्स लिगमा १५ गोल गरेका छन् ।
यसैबीच, रोनाल्डो पूर्वक्लब रियल मड्रिडको पनि सर्वाधिक गोलकर्ता बनेका छन् । उनले रियलका लागि सन् २०१८ भरिमा गरेको गोलका आधारमा रोनाल्डो सर्वाधिक गोलकर्ता बनेका हुन् ।
रोनाल्डोले गत समर सिजनसम्ममा रियलका लागि कूल २८ गोल गरेका थिए, जुन अहिलेको अवस्थामा रियलका कुनै पनि खेलाडीले गरेको गोल संख्याभन्दा बढी हो ।
रियलमा अहिले २७ गोलसहित वेल्स स्टार ग्यारेथ बेल अगाडि छन् । उनीभन्दा माथि रोनाल्डोको २८ गोल छ । रोनाल्डोले रियल छाडे पनि उनले २०१८ मा रियलको जर्सीमा गरेको गोलका आधारमा उनी रियलको सर्वाधिक गोलकर्ता बनेका हुन् ।
रोनाल्डो यसै सिजनको सुरुमा १ सय १६ मिलियन युरोमा रियल छाडेर युभेन्टस पुगेका थिए । ३३ वर्षीय रोनाल्डो अहिले इटालीमा उच्च लयमा छन् । उनले युभेन्टसलाई लगातार कीर्तिमानी जित दिलाउन महत्त्वपूर्ण भूमिका खेल्दै आइरहेका छन् ।
तथ्यांक नै हेर्दा पनि नयाँ लिग र नयाँ टिमसँग रहेर उनले १५ गोल गरिसकेका छन् । यो युभेटन्सको इतिहासमा कुनै पनि खेलाडीले डेब्यु सिजनमा गरेको हालसम्मकै धेरै गोल हो । तर, रोनाल्डोका लागि त अझै आधा सिजन बाँकी नै छ । आधा सिजनमा उनले कति गोल गर्छन्, त्यो अहिले अनुमान गर्न कठिन हुन्छ ।
रोनाल्डोले सिरी ‘ए’ मा १५ गोल गर्दै ८ गोलका लागि पाससमेत मिलाएका छन्, जुन युभेन्टसका लागि यो सिजनको सर्वाधिक असिस्ट पनि हो ।