Ganthan News Pokhara
All news from Pokhara & around

रोनाल्डो भन्छन्– ‘म मेस्सीसँग कहिल्यै डराइनँ, उनलाई इटाली आउन चुनौती दिन्छु’ फुटबल

0

एजेन्सी, मंसिर २४
जारी सिजनको सुरुमा अप्रत्यासित रूपमा रियल मड्रिड छाडेर इटालियन युभेन्टस पुगेका क्रिस्टियानो रोनाल्डोले आफ्ना पूर्वप्रतिस्पर्धी बार्सिलोनाका लिओनल मेस्सीलाई स्पेनभन्दा बाहिरबाट खेल्न चुनौती दिएका छन् । इटाली पुगेपछि पहिलोटक मिडियामा औपचारिक अन्तर्वार्ता दिँदै रोनाल्डोले मेस्सीलाई स्पेन छाड्न चुनौती दिएका हुन् ।

हालसालै इटालीको चर्चित पत्रिका ‘ला गजेटा डेलो स्पोर्टस्’सँगको विशेष अन्तर्वार्तामा रोनाल्डोले आफ्नो करिअरका आगामी योजना, रियल छँदाका अनुभव र रियल छाड्नुका कारणबारे बताएका छन् ।

सो अन्तर्वार्तामा रोनाल्डोले च्याम्पियन्स लिग जित्नु युभेन्टसका लागि ठूलो कुरा नभएको बताएका छन् । ‘जसरी रियल मड्रिडले १०औं पटक च्याम्पियन्स लिग जित्ने सपना देखेको थियो, त्यो सपना युभेन्टससँग पनि छ,’ रोनाल्डोले भने ।

रोनाल्डोले युभेन्टस एक आत्मीय परिवार रहेको पनि बताए । ‘युभेन्टस एक आत्मीय र सच्चा परिवार हो,’ उनले भने ।

रोनाल्डोले स्पेन छाड्नुको कारणबारे बताउँदै आफूले कहिल्यै पनि मेस्सीसँग नडराएको बताए । ‘म कहिल्यै पनि मेस्सीसँग डराइनँ, मैले खेलेका सबै ठूला लिग जितेको छु,’ उनले भने ।

उनले अघि थपे, ‘मैले इंग्ल्यान्डमा खेलें । त्यसैगरी, स्पेन, पोर्चुल र इटालीमा पनि खेलें,’ रोनाल्डोले भने, ‘तर, मेस्सीले हालसम्म स्पेनमा मात्रै खेलिरहेका छन्, उनले अब पनि मेरोजस्तै थप बढी खेल्नुपर्छ ।’

रोनाल्डोले आफू नयाँ चुनौतीका लागि इटाली आएको बताए । ‘मेरा लागि जीवन चुनौती हो । र, मलाई यो मन पनि पर्छ । म आफू र मानिसलाई सकेसम्म धेरै खुसी बनाउन चाहन्छु,’ रोनाल्डोले थपे ।

रोनाल्डोले मेस्सी स्पेनमै खुसी रहेको भए आफ्नो सधैं सम्मान रहने पनि बताए । ‘यदि मेस्सी स्पेनमै खुसी छन् भने मेरो भन्नु केही छैन, उनीप्रति मेरो सधैं सम्मान रहनेछ ।’

३३ वर्षीय रोनाल्डो यसै सिजनको सुरुमा रियलको ९ वर्षे बसाइ बिट मारेर १ सय १६ मिलियन युरोमा युभेन्टस पुगेका थिए । रियलमा छँदा उनले कूल ४ सय ३८ खेलबाट ४ सय ५० गोल गरेका थिए ।

अरु सम्बन्धित खबरहरु