काठमाडौं, २ पुस / गत मंसिर १० र २१ गते पहिलो र दोस्रो चरणमा भएको प्रतिनिधिसभा तथा प्रदेशसभा सदस्य निर्वाचनको समानुपातिक निर्वाचन प्रणाली तर्फको मतगणना सकिएको छ ।निर्वाचन आयोगका अनुसार ९५ लाख ४४ हजार ७ सय ४१ मत सदर भएको छ भने ३१ लाख ७३ हजार ४ सय ९४ मत सहित , नेकपा एमाले पहिलो दल बनेको छ । दोस्रो दल बनेको नेपाली कांग्रेसले ३१ लाख २८ हजार ३ सय ८९ मत पाएको छ । एमालेले कांग्रेस भन्दा ४५ हजार १ सय ५ मत बढी पाएको छ ।
यस्तै नेकपा माओवादी केन्द्रले १३ लाख ३ हजार ७ सय २१ मत पाएको छ भने थ्रेस होल्ड पार गरेका राष्ट्रिय जनता पार्टी नेपालले ४ लाख ७२ हजार २ सय ५४ र संघीय समाजवादी फोरम नेपालले ४ लाख ७० हजार २ सय १ मत पाएका छन् ।प्राप्त अन्तिम मत परिणाम अनुसार विवेकशील साझा पार्टीले २ लाख १२ हजार ३ सय ६३ र राप्रपाले १ लाख ९६ हजार ७ सय ८२ मत पाएका छन् ।राप्रपा प्रजातान्त्रिकले ८८ हजार ३ सय ७७, नयाँ शक्तिले ८१ हजार ८ सय ३७ र राष्ट्रिय जनमोर्चाले ६२ हजार १ सय ३३ मत पाएका छन् ।
मतगणना सकिएपनि निर्वाचन आयोगले अन्तिम मत परिणाम सार्वजनिक गरेको छैन । यो जिल्ला निर्वाचन कार्यालयहरुले इन्ट्री गरेको मतमा आयोग केन्द्रीय कार्यालयको टिमले भेरिफाइ गरिरहेको छ ।यो सकिएपछि मात्र आयोगले औपचारिक रुपमा कुन दलले कति मत पायो भनेर जानकारी गराउने निर्वाचन आयोग प्रवक्ता नवराज ढकालले जानकारी दिए ।प्रतिनिधिसभाको समानुपातिकमा ३ प्रतिशत थ्रेसहोल्ड छ ।कुल सदर मतको ३ प्रतिशत अर्थात २ दाख ८६ हजार ३ सय ४२ मत नपाएका दलहरुले समानुपातिक सिट पाउने छैनन् ।
दलहरूले प्राप्त गरेको मत अनुसार प्रतिनिधिसभामा समानुपातिक तर्फको कुल १ सय १० सिटमा नेकपा एमालेले ४१, नेपाली कांग्रेसले ४०, नेकपा माओवादी केन्द्रले १७, संघीय समाजवादी फोरम नेपालले ६ र राष्ट्रिय जनता पार्टीले ६ सिट पाउने सम्भावना देखिएको छ । उल्लिखित सिट संख्यामा सामान्य मात्र हेरफेर हुन सक्ने आयोग स्रोतले जनाएको छ ।नयाँ दल विवेकशील साझा समानुपातिक तर्फ छैटौं स्थानमा रहे पनि थ्रेस होल्ड पार गर्न सकेन भने दोस्रो संविधानसभामा समानुपातिक तर्फ २४ सिट पाएको राप्रपा पनि यो पटक थ्रेस होल्ड पार गर्न असफल भएको छ ।
पशुपति शम्शेर राणाको राप्रपा प्रजातान्त्रिक, डा. बाबुराम भट्टराईको नयाँ शक्ति र चित्र बहादुर केसी नेतृत्वको जनमोर्चा र नारायणमान विजुक्छे नेतृत्वको नेमकिपा पनि थ्रेस होल्डका कारण समानुपातिकमा सिट पाउन असफल भएका छन् । प्रतिनिधिसभामा भने प्रत्यक्ष तर्फ नेकपा एमालेले ८०, नेकपा माओवादी केन्द्रले ३६, नेपाली कांग्रेसले २३, राजपाले ११, संघीय समाजवादी फोरमले १०, नयाँ शक्ति पार्टी, नेपाल, राप्रपा, नेमकिपा, राष्ट्रिय जनमोर्चा र स्वतन्त्रले एक-एक सिट जितेका छन् ।