पोखरा, १३ फागुन / छोरेपाटन, कृस्ती, निर्मलपोखरी, भरतपोखरी (SNRTP) सडक अन्तर्गत आजदेखि पोखरा महानगरपालिका वडा नं ३३ भरतपोखरी खण्डमा सरसफाई कार्य सुरु गरिएको छ । सडक सरसफाई कर्मचारीका टोली प्रमुखलाई वडा सदस्य दीपक लामिछानेले हाजिरी रजिष्टर हस्तान्तरण गर्दै कामको शुभारम्भ गर्नुभयो ।
छोरपाटनबाट सुरु भै लामेआहाल जोडिने २२ किलोमिटर सडक अन्तर्गतको अधिकांश भागबाट माछापुच्छ«े, अन्नपूर्ण, धवालागिरी हिमाल सहितका रमणीय हिमश्रृङखला, पोखरा एवम् लेखनाथका सुन्दर ताल सहितका दृश्य एकसाथ अवालेकन गर्न सकिने वडा सदस्य लामिछानेले बताउनुभयो ।
“उच्च हिमाली, पहाडी एवम् पोखरा महानगरका रमणीय दृश्यका कारण यो सडक मार्ग पर्यटकीय दृष्टिले पनि अत्यन्त महत्वपूर्ण छ,” – उहाँले भन्नुभयो ।
छोरेपाटनबाट सुरु हुने यो सडकमार्गबाट कृस्ती, निर्मलपोखरी हुँदै भरतपोखरीको गैरागाउँ, बरपाण्डेथुम, बरमाझथर, मनियलडाँडा, धारपानी, मालागिरी, आँपुभञ्ज्याङ, लामगादी हुँदै पृथ्वीराजमार्गको लामोआहाल पुग्न सकिन्छ ।
सडकको स्तरोन्नतिसँगै यहाँका बरपाण्डेथुम, हुडिकोट जस्ता स्थानमा पुग्ने आन्तरिक पर्यटकको संख्या बृद्धि हुँदै गएको छ भने कोटभैरव जस्ता धार्मिक पर्यटकीय स्थल पनि पर्यटककको रोजाइमा पर्न थालेका छन् ।