पोखरा, १२ पुस /पोखरा रंगशालाको पुरानो फुटबल प्यारापिट बुधबारदेखि भत्काउन सुरु गरिएको छ । पश्चिमान्चल क्षेत्रिय खेलकुद विकास समितिले दर्शक प्यारापिटबाट भत्काउने सुरु गरेको हो । भुकम्पका कारण जिर्ण भएको रंगशाला भत्काउन सुरु गरेको पश्चिमाञ्चल क्षेत्रिय खेलकुद विकास समितिका अध्यक्ष खगराज पौडेलले बताए ।
करिब १ अर्व ३३ करोडको लागतमा पोखरा फुटबल स्टेडियम अबको १० महिनामा निर्माण सम्पन्न हुने गरि काम थालिने अध्यक्ष पौडेलले बताए । उक्त स्टेडियम निर्माणका लागि राष्ट्रिय खेलकुद परिषद्ले ग्लोबल टेण्डर समेत आह्वान गरि टेण्डर प्रक्रियालाई अन्तिम चरणमा पु¥याएको अध्यक्ष पौडेलले बताए ।
हालको संरचना भत्काउन परिषदले ४४ लाख रुपैंया निकासा गरिसकेको उनले जानकारी दिए । अबको एक महिनामा पुरानो संरचना भत्काएर ग्लोबल टेण्डरमा स्विकृती पाएको कम्पनीले नयाँ निर्माण अघि बढाउने अध्यक्ष पौडेलले बताए ।
उनले सन् २०१९ को मार्चमा नेपालमा आयोजना गरिने १३ औ दक्षिण एशियाली खेलकुदलाई मध्येनजर गर्दै नयाँ संरचना बनाउन फुटबल रंगशाला भत्काएको बताए ।