पोखरा, २८ फागुन /सोमबारबाट सुरु भएको पोखरा महानगरपालिका स्तरीय कक्षा ८ को पेशा व्यवसाय र प्रविधि विषयको परीक्षा स्थगित भएको छ ।
फागुन ३० गते निर्धारित सो विषयको परीक्षा चैत ७ गते बिहीबार बिहान १०ः३० सम्मका लागि सारिएको परिक्षा शाखाले जनाएको छ ।
महानगरस्तरीय परीक्षा समितिले एक सूचना जारी गरी यसबारे जानकारी दिएको हो । विशेष कारणवश परीक्षा सारिएको उक्त सूचनामा उल्लेख छ । नेत्रबिक्रम चन्द विप्लव नेतृत्वको नेकपाले घोषणा गरेको नेपाल बन्दका कारण परीक्षा सरेको भनाई छ ।
“पूर्वघोषित नेपाल बन्दका कारणले परीक्षा सार्ने निर्णय भएको हो”, शिक्षा महाशाखा प्रमुख हेमप्रसाद आचार्यले भने । महानगर अन्तर्गतका विभिन्न विद्यालयहरुको चासो र सुरक्षालाई ध्यानमा राख्दै यस्तो निर्णय गरिएको आचार्यले जानकारी दिए ।