पूर्वराजा ज्ञानेन्द्रको स्वागतद्वार भत्काइए, अवरोध पुर्‍याउन सप्तरी बन्द

जिल्लाबाट प्राप्त समाचारअनुसार शाहको भ्रमणको पूर्वसन्ध्यामा भत्काइएका ती स्वागतद्वारहरुको पुनर्निमाण लगभग पूरा भइसकेको छ र भ्रमणमा आयोजकहरुले जिल्ला प्रशासनलाई कुनै पनि व्यवधान या प्रतिकूल परिस्थिति उत्पन्न भएमा त्यसको जिम्मेवारी प्रशासनले नै लिनुपर्ने बताएका छन् ।  पूर्वराजा शाह शुक्रबार तराईका विभिन्न जिल्लाहरुको भ्रमणको सिलसिलामा सिमरा पुगेका थिए र आज सिमरादेखि सप्तरीसम्मको करिब २ सय किलोमिटर दुरी सडकमार्गबाट तय गर्ने कार्यक्रम थियो ।

निर्मलनिवास निजी सचिवालयका अनुसार भ्रमणका तयारी भइसकेको र आयोजकहरु कुनै पनि हालतमा यसमा हेरफेर गर्न तयार नभएकाले ‘जनचाहनाअनुसार’ कार्यक्रम यथावत रहनेछ । फागुनमा नै निर्धारित उक्त कार्यक्रम छोरा पारसको गम्भीर बिमारीका कारण ज्ञानेन्द्र शाह तथा उनकी पत्नी कोमल ब्यांकक गएकाले स्थगित भएको थियो ।

उक्त क्षेत्रका मठमन्दिर दर्शनका साथै आम नेपालीसँग भेटघाट, अन्तक्र्रिया र विद्यमान परिस्थतिको जायजा लिने उद्देश्यले समेत पूर्वराजाले स्थगित उक्त यात्रा सुचारु गरेको जानकारी प्राप्त भएको छ । उनी आइतबार बिहान साढे आठ बजे सिमराबाट सप्तरीका लागि प्रस्थान गरेका छन् ।

सप्तरी, सर्लाही, धनुषालगायतका क्षेत्रहरुमा शाहको भ्रमण हुने निर्धारित कार्यक्रम छ र स्थानीय तहमा ठूलो समूहले पूर्वराजा मुलुकको स्थितिप्रति उदासीन हुनु अपराध भएको दाबी गर्दै उनलाई सक्रिय हुन दबाबसमेत दिइरहेको छ । ठाउँठाउँमा ‘राजा आऊ, देश बचाऊ’ नाराका साथ शुक्रबार उनको स्वागत भएको थियो र सिमरामा विगत दुई दिनयता ठूलो संख्यामा स्थानीयले भेटी राष्ट्रिय संकटको यो बेलामा आफ्नो भूमिका र दायित्व नबिर्सनसमेत आग्रह गरेका थिए ।  cp. setopati.com