बढ्यो जाडो,जाडोकै कारण उडानमा समस्या, गाउँले जनजीवन प्रभावित, शहरमा पनि समस्या

76

पोखरा, २७ पुस/सँधै स्कुटरमा हुँईकिने तनहुँ दुलेगौँडाका रञ्जना थापा पछिल्लो समय अत्याधिक जाडो बढेपछि यताउती जानको लागी नगर बस चढ्न थालेकी छन् । मिस मगर २०१२ की विजेता समेत रहेकी रञ्जनालाई दिन दिनै पोखरा आउने जाने गर्नुपर्छ । फेशन डिजाईनिङ सम्बन्धि कलेज आईईसीमा अध्ययनरत उनलाई स्कुटरको यात्रा निकै सहज लाग्छ, ‘तर के गर्नु बिहान बिहान आउँदा पुरै चिसो हुन्छ र साँझ फर्कदा पनि उस्तै चिसो, त्यसैले जाडो महिनामा मैले स्कुटर नचढ्ने निर्णय गरेँ ।’ उनले भनिन् ।

पोखरा र आसपासमा केहि दिन यता जाडो हर्लक्कै बढेको छ । मौसम नै जाडोको भएपनि पछिल्ला केहि दिनहरुमा अत्याधिक नै जाडो भएको सर्वसाधारणहरुले महशुस गरेका छन् । पोखरामा जाडो बढेसंगै मानिसहरुको दैनिकिमा समेत केहि परिवर्तन आएको छ । जाडो बढेकै कारणले स्कुल र कलेजहरुले यो समयमा विद्यार्थीहरुको सजिलोको लागी जाडो बिदा पारेका छन् ।

प्राप्त समाचारहरुलाई आधार मान्ने हो भने काठमाण्डौको न्यूनतम तापक्रम माईनसमा झरेको छ । काठमाण्डौमा मंगलबारको न्यूनतम तापक्रम माईनस १ दशमलब १ डिग्री सेल्सियस मापन भएको छ । तराईका विभिन्न ठाउँमा चिसोकै कारणले कति जनाले ज्यान गुमाईरहेका छन् । उच्च हिमाली भेगका बासिन्दाहरु चिसो बढेलगत्तै शहरतिर झरिसकेका छन् । पोखरामा पनि पछिल्लो समय जाडो अत्याधिक बढेको स्थानियबासीहरु बताउँछन् । विहान र बेलुकाको समयमा जाडोले गर्दा मानिसहरु निकै कम मात्र सडकमा आउने गरेका छन् । विहान विहान मर्निङ वाकका लागी जानेहरुको भीड पनि पछिल्लो समय पातलिँदै गएको छ ।

पोखराको हावापानी कार्यालयले दिएको जानकारी अनुसार मंगलबार पोखराको न्यूनतम तापक्रम ४ दशमलब ८ डिग्री सेल्सियस रह्यो । पोखरामा जाडो दिनप्रतिदिन बढ्दै गएको छ । जाडोसंगै पोखरामा विहान बाक्लो हुस्सु समेत लाग्ने गरेको छ । बाक्लो हुस्सु लागेकै कारण भिजिविलिटी नहुँदा मंगलबार जोमसोमको लागी उडान हुन सकेन । हुस्सुकै कारणले काठमाण्डौँको उडान पनि ११ बजेपछि मात्रै भएको विमानस्थल स्रोतले जनाएको छ । ‘यो सिजनमा हुस्सुको कारणले उडान रोकिईरहने हुन्छ ।’ पोखरा विमानस्थलका प्रमुख प्रतापबाबु तिवारीले भने–‘जाडोकै कारणले अहिले मनाङको उडान हुन सकेको छैन ।’ मनाङको लागी हप्ताको दुई पटक उडान हुँदै आएको थियो । त्यस्तै हप्ताको एउटा मात्र उडान रहेको जुम्लाको लागी पनि जाडोको कारण उडानमा समस्या देखिँदै आएको विमानस्थल स्रोतले जानकारी दिएको छ ।

कास्कीको अत्याधिक जाडो हुने क्षेत्र मानिने लुम्लेमा जाडोकै कारण जनजीवन प्रभावित बनेको छ । लुम्लेका स्थानियबासी केशव पौडेलले दिएको जानकारी अनुसार लुम्लेमा केहि दिन यता दिउँसो पनि राम्ररी घाम लागेको छैन । ‘अघिपछिको भन्दा निकै चिसो महशुस भएको छ ।’ उनले भने–‘पानी परेको खण्डमा हिउँ झरिहाल्ने जस्तो मौसम देखिएको छ ।’ कास्कीका उत्तरी गाविसहरुमा समेत जाडोको कारणले जनजीवन प्रभावित बनेको छ ।

जाडोको बेलामा शहरी क्षेत्रमा न्यानोको लागी हिटर, एसी जस्ता सामाग्रीहरु प्रयोग गरिने भएपनि एकाएक बढेको लोडसेडिङले सर्वसाधारणहरुलाई अझै जाडो माथि जाडो थप्ने काम गरेको छ । यद्यपी बेलाबेलामा आउने बत्तिको सदुपयोग गर्दै सामाजिक संजाल प्रयोगकर्ताहरुले आफ्नो दुख संजालमार्फत पोखिरहेका छन् । जाडोले समस्यामा पारेपनि कुनै कुनै फेसबुक प्रयोगकर्ताहरुले आफ्नो वालमा यसरी लेखेका छन्, ‘सरकार कि आगो ताप्नलाई दाउरा देऊ, होईन भने बिजुली देऊ’

Get real time updates directly on you device, subscribe now.

👇 यी पोस्टहरु पनि हेर्नुहोस् ।
Loading...