क्रान्ति शाह
५ जेठ, वीरगञ्ज । नेकपा-माओवादीका महासचिव रामबहादुर थापा बादलले खिलराज रेग्मी नेतृत्वको वर्तमान सरकारले पनि चुनाव गराउन नसक्ने ठोकुवा गर्नु भएको छ । उहाँले रेग्मीसंग चुनाव गराउने हैसियत नभएकाले आगामी मंसिरमा पनि निर्वाचन हुने नसक्ने वताउनु भएको हो ।
क्रान्तिकारी पत्रकार महासंघ पर्साले आइतवार वीरगन्जमा गरेको पत्रकार सम्मेलनमा बादलले चार दलीय गठबन्धनले गरेको २५ बुँदे सहमति खारेज नगरेसम्म वार्ताको कुनै औचित्य नभएको वताउनुभयो । उहाँले आफुहरु वार्ता र चुनाव विरोधी नभएको समेत स्पष्ट पार्नु भयो । बादलले भन्नु भयो,’कुनै पनि विदेशी प्रभुहरुले गरेको निर्णय स्वीकार्य हुन सक्दैन । शासन सत्ताको बाग्डोर राजनीतिक दलहरुकै हातमा आउनु पर्ने बताउँदै उहाँले गोलमेच सम्मेलन मार्फत संविधान निर्माण गर्नु पर्ने धारणा व्यक्त गर्नु भयो ।
उहाँले गोलमेच सम्मेलन माओवादीको अन्तिम विकल्प भएको र माग पुरा नभए सशक्त सडक संघर्ष गर्ने चेतावनी दिनु भयो । एमाओवादीका अध्यक्ष प्रचण्डले बहालवाल प्रधानन्यायाधीश रेग्मीलाई सरकारको जिम्मेवारी दिएर न्यायपालिका ,कार्यपालिका र व्यवस्थापिका तीनवटै शक्ति एउटै व्यक्तिमा केन्दि्रत गरी आफ्नो स्वार्थ सिद्ध पुरा गर्न लागि परेको बादलको आरोप छ । उहाँले भारतकै योजना र दबाबमा प्रतिगमनकारी लोकमानसिंह कार्कीलाई चार दलले अख्तियार प्रमुख बनाएको ठोकुवा समेत गर्नु भयो ।
– See more at: http://www.onlinekhabar.com/2013/05/72426/#sthash.Ojs2Aa63.dpuf