पोखरा, २८ साउन /साउन अन्तिम सोमबार हजारौं भक्तजनले पोखराको केदारेश्वर मन्दिर दर्शन गरेका छन् । शिवलिंगमा जल चढाउन तथा पूजाआजाका लागि भक्तजन बिहान ३ बजेदेखि नै लाइन बसेका थिए ।
भक्तजनको भीड यसरी उर्लियो कि उनीहरु साँझसम्म मन्दिरमै पूजाथालीसहित पंक्तिबद्ध देखिन्थे ।
‘बोलबमको ध्वनीले, शान्ति पाउन् साराले’ भन्ने मूलमन्त्रका साथ यसपालिको १५ औं संस्करणको बोलबममा अन्य सोमबारको तुलनामा भक्तजनको भीड बढेको केदारेश्वर महादेवमणि सेवाश्रम समितिका पीठाधीश डा. लेखनाथ आचार्य बताउँछन् ।
सदाझैं सेतीनदीकिनरा गाईघाटमा पवित्र जल उठाई भक्तजन बाजागाजाका साथ भजनकीर्तन गर्दै फेवाताल किनार केदारेश्वर मन्दिरमा पुगेका थिए । मन्दिरमा विदेशी पर्यटकको पनि उपस्थिति पनि उस्तै थियो । उनीहरु भजनमा नाचेर दंग परे ।
बोलबम संयोजक शंकर खरालले कार्यक्रमलाई अघिल्ला वर्षझैं अपार सफलतासहित सम्पन्न गराउन सहयोग गर्ने सम्पूर्णलाई धन्यवाद दिए ।
गाईघाटमा १०८ धारामा स्नान, ८ किमी पैदलयात्रासहित केदारेश्वर मन्दिरमा १०८ शिवलिङ्गमा जलार्पण गर्न पाइने हुँदा आठ संयोगका कारण केदारेश्वरको महत्व बढेर गएको मन्दिरका सचिव खिमबहादुर पहारीले बताए ।
मन्दिर उपाध्यक्ष शंकर पोखरेलले कार्यक्रममा सहयोग पु¥याउने संघसंस्था र व्यक्ति विशेषलाई अन्तिम दिन सम्मान गरिएको जानकारी दिए ।
पैदलायात्रामा रहेका भक्तजनलाई नगरका ठाउँ ठाउँमा विभिन्न संघसंस्थाले सर्वतपानी खुवाएर सहयोग गरेका थिए भने मन्दिर परिसरमा भक्तजनलाई एन.बी. व्यवसायी समितिले प्रसादको व्यवस्था मिलाइएको थियो ।
यस्तै सामाजिक जागरणका लागि नारी अभियान र प्रगति दिदीबहिनी समूह लगायतले पनि असक्तलाई भोजन खुवायो ।