पोखरा, १ बैशाख/गण्डकी प्रदेशको राजधानी पोखराबाट शनिबार नेपाल भ्रमण वर्ष–२०२० शुरुवात भएको छ । शनिबार साँझ आयोजित कार्यक्रममा गण्डकी प्रदेशका मुख्यमन्त्री पृथ्वीसुव्वा गुरुङले भ्रमण वर्ष औपचारिक उद्घाटन गरे । महत्वाकांक्षी २० लाख विदेशी पर्यटक भित्राउने लक्ष्यसहित भ्रमण वर्ष सुरु भएको हो ।
कार्यक्रममा मुख्यमन्त्री गुरुङले समृद्धिको आधार पर्यटनलाई मानेर प्रदेश सरकारले आफ्ना गतिविधि अगाडि बढाइरहेको बताए । उनले पर्यटकको बसाइ बढाउन गण्डकी प्रदेशले २ सय ३२ वटा होमस्टे सञ्चालमा ल्याइ सकेको बताए । उनले पर्यटनले नै देश विकास गर्ने भन्दै गण्डकी प्रदेशमा भातरबाट धार्मिक पर्यटक ल्यान सकिने बताए ।
संस्कृति, पर्यटन तथा नागरिक उड्डयन मन्त्रालयका सचिव मोहनकृष्ण सापकोटाले पर्यटकको बसाइँ लम्बाउने गरी आवश्यक पर्यटकीय पूर्वाधारमा निर्माणमा जोड दिए । उनले सडक तथा हवाई यातायातमा सुविधा थप गरिने भन्दै ३ तहको सरकार मिल्यो भने २० लाख पर्यटक भित्राउन कठिन नरहेको बताए । नेपाल भ्रमण वर्ष–२०२० संयोजक सुरज बैद्यले नेपालमा धेरै भन्दा धेरै पर्यटक ल्याउन काठमाडौं विमानस्थललाई दसैँसम्म सुधार गरिने बताए ।
नेपाल पर्यटन वर्ष २०११ का संयोजक सुरेन्द्र शाक्यले राजीतिक अस्थिरताबीच सो समयमा ५ लाख पर्यटक भित्राएको स्मरण गरे । उनले हाल राजनीतिक समस्या समाधान भएकोले लक्ष्य प्राप्तिमा गर्न सफल भइने बताए । उनले नेपाल घुम्ने पर्यटकबाट के लिने भन्दा के दिने भन्नेतर्फ सोच्नुपर्नेमा जोड दिए ।
नेपाल भ्रमण वर्ष–२०२० का राष्ट्रिय कार्यसम्पादन समिति सदस्य विप्लव पौडेलले अघिल्लो वर्ष ११ लाख बढी पर्यटक आएकोमा यो संख्या दोब्बर पार्ने लक्ष्यसहित सरकारले पर्यटन वर्ष मनाउन लागेको बताए । नेपाल भ्रमण वर्ष सफल बनाउन चालु आर्थिक वर्षको बाँकी ३ महिना (वैशाख–असार)का लागि अहिले खर्च गर्न मिल्ने गरी १० करोड रुपैयाँ पनि सरकारले दिएको छ । यो रकमले तीन महिना अवधिमा प्रवद्र्धनका कामदेखि केही पूर्वाधार बनाउन समेत खर्च गरिने छ ।
पर्यटनमा अन्तर्राष्ट्रिय लगानीकर्तालाई नेपाल भित्राउन सम्मेलन गर्ने तयारी पनि गरिएको छ । त्यस्तै भारतका विभिन्न सहरमा माइस टुरिजमका लागि प्रवद्र्धनका कार्यक्रम पनि गर्ने तयारी भइरहेको छ । त्यसबाहेक नेपाल पर्यटन बोर्डले पनि प्रवद्र्धनको अभियान चलाएको र त्यसमा सहकार्य गर्ने योजना रहेको बताइन्छ ।
नेपालमा भित्रिने पर्यटकलाई आवश्यक जानकारी दिन नेपाल र भारतका सिमा नाकासहित सातवटा ठाउँमा ‘नमस्ते सेन्टर’ बनाउने तयारी छ । पोखरा सहित काकरभिट्टा, जनकपुर, बिराटनगर, भैरहवालगायत ठाउँमा पर्यटकलाई स्वागत सत्कार गर्न मिल्ने गरी नमस्ते सेन्टर बन्नेछन् ।
पोखराबाट नेपाल भ्रमण वर्ष–२०२० उद्घाटन
पोखराबाट नेपाल भ्रमण वर्ष–२०२० उद्घाटन
Posted by Ganthan.com on Saturday, April 13, 2019